सम्दिस्या !
सगुन पोङ थान्बारि पुइबा मुबा
आपा मयुङकादेसे 
किन्जि वा आकिन्नि ताला
सगुन पोङ ?

ठेगान पोङ दा
आइराक तेगो कि तेआदो ताला
वा सम्दिस्या !
दिमरि थान्बा 
ब्याड्ला ङाछ्याङ हाप्पा
नागा वाबा चुङ्सि
पुइगो कि पुइआदो सम्दिस्या ?
ह्याङ मावर ल्हरि ख्रेसि
पे नुन आपेना,
क्वान्बा क्वान नुन स्युसि
गुमलाप्तेला बा थुसि
क्वान सोसि क्लाङ्बा
गुमलाप्तेला गुगि पेक्थासि
क्युइ थुङ्बा
पाड्कि तेबा
ह्याङ्ला चेगाइ खिबादा
एला सेम थान्बारि
जाबि डुप्सि ।
सम्दिस्या !
ङाइमि डान्जिबा मुला
कोलेसे, सिलिङ्लिङ छ्योङ्चिबा लाबा 
लाबारि फ्याङ्चिबा 
ग्वाइकादे
ग्वाइदा ताप्सि ताप्सि
क्लाङचिबा चिठाकादे
उ...क्यार
डुइरि क्यार
ओसो डान्मा
ह्राङ्ला मायुङसे
ग्वाइ ताप्पाराङ
ताप्जि बिसाम
कोलेसे...
ङयोइगे म्हान्जि
एला न्हाबेङरि
ङा गुम लाप्तेला पाड्कि म्हाइसि ब्रामा
एसे टाडा थुसि, स्यामो थुसि
ख्राङ्सि ङादा दिगु पिन्बा 
बाप थुङ्बादा
थोङ्से स्होबा चेगाइ एसे ।
आपा आमादा
सुङस्युगो या सम्दिस्या !
ह्याङला चेगाइला राप
तिगा था ?

सगुन पोङ 
ङ्योइसाङ पोङ,
ठेगान पोङ पुइजि बिसाम
फ्लिक दोसि माम
सम्दिस्या !
हान्देला 
ख्लेला ताम ह्राङ
ह्युल्बाला स्थिति ह्राङ ताला ताला
तिगा लाउ तिगा दाउ
वा सम्दिस्या !
ह्याङ्ला चेगाइ ।
(छिगला अर्थः चेगाइ– माया, पड्कि– पाट ।)