पिरोजपुर, सुल्तानपुर, उत्तरप्रदेसला रमासङकर यादब ह्वाइखा ब्रिबा कारन बिद्रोहि दोजि । कानुनला डोबा ख्लासि जवाहरलाल नेहरु बिस्वबिद्यालय (जेएनयू) रि हिन्दि ग्योइकाइ डोबारि खाबा बिद्रोहि ह्राङदा ह्युल्बाला ह्वाइखा ब्रिखेन म्हान्मुबा । ह्वाइखाला धुनरि छात्र ल्हुइ लिच्छा नोन थेसे जेएनयु क्याम्पसदा ह्राङला चिबा ग्ला सहोचिजि । थेसे बिबा लामुबा, ‘जेएनयु ङाला कर्म ग्ला हिन्ना । ङाइ चुर्ला होस्टलजुगु, गाङजुगु थेन ह्रिजुगुरि ह्राङला रे थाबा लामुला ।’ थे तिलाइ आयस्रोत आरेसाइ छात्रछात्राजुगुदा ह्रो लाबारि गे लाचिजि । ह्राङला मुतेबा ल्हुइ ब्यबस्था लिब्रो पुइबा थे ८ डिसेम्बर २०१५ रि बिद्यार्थिला आन्दोलन गुङरि ह्याङला ओन्छाङ ग्याम बिदा ताजि । थेला ‘नइ खेती’ मिनला ह्वाइखा पोप तेबा मुला ।

ङा न्यायला कठघरारि राप्बा मुला
प्रकृति थेन म्हि ङाला पक्षरि राप्गाइ
थेग्याम पाङचिबा मुला
जहा मोनजोदाडोला ग्योइला लिच्छाला चाम मुला 
जहा म्रिङकोलाला क्रोबा लास ब्याङबा मुला
ओम, ग्योइरि म्हिजुगुला नाख्रुजुगु क्यार्सेजासे ब्याङबा मुला
चुह्राङ लासि याखारगि म्रिङकोलाला क्रोका लास
ह्राङसे बेबिलोनियारि नोन स्याप्सेला मुला
ओम, ओस्बान प्रकारला म्हिजुगुला ठाम्चिबा म्हिजुगुला नाख्रुजुगु
मेसोपोटामियारि नोन
ङाइ म्हान्बा मुला, 
कि आखिर चु तिला ताम हिन्ना
कि ओन्माला सभ्यताला 
मुहानरि याखारगि म्रिङकोलाला क्रोबा लास स्याप्ला 
ओम, म्हिला ठाम्बा नाख्रुजुगु स्याप्बा मुला 
थेला ताङ
सिथियाला चट्टानहेन्से
बंगालला चेदोना
सवानाला ह्रि हेन्से
कान्हाला ह्रिदोना ल्हेबा मुला
याखारगि म्रिङकोला थे आमा ताबारि खाम्ला
आङा ताबारि खाम्ला 
म्रिङ ताबारि खाम्ला
जामे ताबारि खाम्ला 
ङाइ पाङला, 
एनिकादे क्यार निउ ङाहेन्से
ङाला का प्योचिबा मुला
ङाला तिङ हारचिबा मुला
ङाला ल्हुइ क्रोचिबा मुला
ङाला आमादा, ङाला आङादा
ङाला म्रिङदा
ङाला जामेदा
सेबा मुला
ङाला पुर्खाजुगु
मुरि आर्तनाद लाचिबा मुला
ह्रो
ङा चु म्रिङकोलाला क्रोबा लासफिरि
ह्राङला थोबो थोक्सि ल्हुइ पिन्सेला मुबा
ङाला याखारगि जामे आरेबा हिन्साम
ओम, ङाला जामे थेसे बिचिबा मुला
कि आपा ए बित्थारिन
ङानि जामेजुगुला बारेरि 
चोदे ल्हाना भाबुक ताबाकेन मुला
ङानि जामेजुगुमि सिङला मुढा न्हा हिन्ना
जो दिङलिच्छा कुदापरि युला
... मित्रजुगु !
चु म्हिला क्यर्सेजासे ठाम्बा नाख्रुजुगु
रोमनला गुलामजुगुला नोन ताबारि खाम्ला
ओम, बंगालला जुलाहाजुगुला नोन
या अति आधुनिक
भियतनामि, फिलिस्तिनि लाइनुजुगुला नोन
साम्राज्य आखिर साम्राज्य नोन ताला
चाहे थे रोमन साम्राज्य मुगाइ
ब्रिटिस साम्राज्य मुगाइ या अत्याधुनिक अमेरिकि साम्राज्य
थेला गिक्खने गे ताला
कि गाङजुगुरि, पठारजुगुरि, स्योङ किनाररि
सागर तिररि
चेरि
म्हिजुगुला नाख्रुजुगु ठामपिन्बा !
थे दोङरापरि थे छिगरि
पेस लाबा दाबा लाला कि ङान्छा जाम्बुलिङरि मे फुइजि
कि ङान्छे जाम्बुलिङरि मे दिपिन्जि
कि ङान्छे जाम्बुलिङरि 
म्हिजुगुला नाख्रु क्यार्सेजासे ठामपिन्जि
तासाइ ङा
स्पार्टकसला वंसज
स्पार्टसकसला प्रतिज्ञाअन्सार नोन सोला
निसि पाङपिन्गो
एला सिनेटरतेन
कि ङा दुनियाला मुतेबा गुलामजुगुदा
बोगि लाबाकेन मुला
थेलिच्छा खासेला मुला रोम तिरेकुनु जरुर
तासाइ ङानि खानाङए निसेला आरे
तिल्दाबिसाम ठिक चुनोन दुइरि
जब ङा ह्वाइखा ब्रिचिबा मुला
ल्याटिन अमेरिकि मजदुर
महान साम्राज्यला लागि दुर्सा ख्वाचिबा मुला
ओम भारतिय मजदुर थेला नहासि थान्बा नाम्युङला गालरि क्युइ युचिबा मुला
ह्रो, एसियाहेन्से अफ्रिकादोना
घृनाला मे लुङबा मुला
चु मे सिबारि आखाम
तिल्दाबिसाम
चु मे, याखारगि म्रिङकोलाला क्रोबा ल्हुइला मे हिन्ना
चु मे, म्हिजुगुला क्यार्सेजासे ठाम्बा नाख्रुजुगुला मे हिन्ना
दोङरापरि ङ्हाच्छारेम म्रिङकोलाला हत्या
थेला कोलासे आपासे कुल्बा अन्सार लाजि
जमदग्निसे बिजि–
ओ परसुराम !
ङाइ एदा कुल्सेला मुला कि एसे एला आमाला हत्या लाउ
ओम परसुरामसे लापिन्जि !
चुह्राङ लासि कोला आपाला ताजि ओम आपाला सत्ता तिजि
आपासे ह्राङला कोलाजुगुदा सेजि
जान्हविसे ह्राङला फातेन बिजि एदा पाङबाकेन मुला कि
ङाला सन्तानजुगुदा ङातेन छ्याम नोन ब्योङगो
ओम, ग्ले सान्तुनसे ह्राङला सन्तानजुगुदा
गंगारि ब्योङपिन्जि
तासाइ सान्तुन जान्हविला आतानि
तिल्दाबिसाम ग्ले खालाइला आता
लक्ष्मि खालाइला आता
धर्म खालाइला आता
तासाइ चु मुतेबा ग्लेला ताबा लाला
म्हेए नोन, गंगाए नोन, गिताए नोन ओम गायत्रिए नोन
ओम, लामि खाइमाओम ग्लेला ताला लागि छे थाबाकेन मुला
थे बडो इमानदार मुबा ओन्छ्यान
ग्लेला स्वामिभक्त मुबा
तासाइ अफसोच मुला कि थे दारे चुरि आरे
ल्हानान रे ताजिन्जि थे सिबा
... ओम जब सिजि तब ग्लेसे थेदा कफन सुताइ आपिन्नि
ल्हुबाला लागि गज ङ्हि साए नोन आपिन्नि
खालाइदा थाहा खबर नोन आरे कि लादा खानाङ ल्हुबा मुला
लिच्छारि ला डोङजि
ओम थेला डोङबा ऐतिहासिक साबित ताजि
चु दोङराप ब्रिखेनजुगुला भनाइ हिन्ना 
दोङराप ब्रिखेनजुगुला चु भनाइए नोन मुला कि 
ग्लेए नोन सिजि थेला रानि ए नोन सिजि
थेला कोलाए नोन सिसि निजि
ग्ले लडाइरि सिजि
रानि कराइरि सिजि
ओम कोला ? 
कोला पडाइरि सिजि
तासाइ ग्लेसे पिन्बा धन
धन आचिनि
धन का (वचन) दोजि
ओम दोसिन थेनोन ताम
मुतेबा सभ्यताला मुहानरि
याखारगि म्रिङकोलाला क्रोबा लास
ओम म्हिजुगुला क्यर्से जासे ठाम्बा नाख्रुजुगु
चु लास क्रोबा आहिन
ख्राङबा हिन्ना ह्रो
चु नाख्रुजुगु क्यार्सेजासे ठाम्बा आहिन क्यार्सेजासे ठाम्बा हिन्ना
चु मे ल्हागाब लाबा आहिन
चु युद्ध ? 
तिबा आहिन, तिबारि पुङबा हिन्ना
तासाइ ह्वाइखाए नोन ब्रिबा आहिन
ब्रिपुङबा हिन्ना
ओम, जब ह्वाइखा ब्रिपुङला तब मे लुङला
ङाइ पाङबाकेन मुला एनिकादेतेन
थेदा चु मेग्याम सोना लाउ ह्रोजुगु
पुर्बला ह्रोजुगु !
ङादा चु मे ग्याम सोना लाउ
थेला ज्याबा–जेबा बुजुगु
तरबारला धारग्याम मोइजि 
थेला अन्नादा रथला पाङग्राजुगुसे नाङजि
ए पस्चिमला ह्रो !
ङादा चु मे ग्याम सोना लाउ
थेला जामेकोलादा बजाररि चुङजि
थेला कोलाजुगुदा चिम्निरि म्राजि
ए उतरला ह्रो !
ङादा चु मेग्याम सोना लाउ
थेला पुर्खाला गोरि गाङ बासि ब्याजि
ए सुदुर दछिनला ह्रो
ङादा चु मेग्याम सोना लाउ
थेला बस्तिदा दावाग्निरि ख्राङजि
थेला नाउदा नुप्बा क्युइ हुइरि ब्लुम्जि
एनिकादे दारे डिक्सि ङादा सोना लाउ
थेला काला डेङसे
पिरामिड स्होजि, मिनार स्होजि
डेङ स्होजि
तिल्दाबिसाम ङादा सोना लाबा थे म्रिङकोलादा सोना लाबा हिन्ना
थेला लास
मोहनजोदाडोला ग्योइला लिच्छाला चामरि ब्याङबा मुला
ङादा सोना लाउ
थे म्हिजुगुदा सोना लाबा हिन्ना
थेला नाख्रुजुगु ग्योइरि क्यार्सेजासे ठाम्बा मुला
ङादा सोना लाबा
ह्राङला पुर्खादा सोना लाबा हिन्ना
ङादा सोना लाबा ह्राङला लातुकुदा सोना लाबा हिन्ना
एसे ङादा सोना लाउ
तिल्दाबिसाम ङा एला ह्वाइखा ब्रिखेन हिन्ना ।

दोःबा : यकिना अगाध