हिन्ना, ङा मुबा ग्लेवादी !
इलामला टुँडिखेलरि ग्ले वीरेन्द्रदा
फ्याफुल्बान हिन्ना 
तिगाइ आगोबा जातुकु दुइरि । 
तासाइ, दोचिबारि आखाम्नि
ङाला पुर्खातेन थुइबा दोङरापसे
डुङ्बा दिमागला चुकुल ठ्वाङ्माहेन्से
दोचिबारि आखाम्नि
ङाला राज्यरि रेमरेम
आक्रमण लामा नोन
ब्रेमाहेन्से
लुसि
सोझो ङाला पुर्खाला
थोबो थासि
रोशी स्योङरि का ब्योङ्बा
थाहा याङ्माहेन्से 
ङा दोचिबारि आखाम्नि
ङा ग्लेवादी दोचिआखाम्नि । 
ङा ह्युल ब्यान्सि
मासिन्या स्होसि
म्हासतिबारि म्हाइजि । 
दिगुदोना आपिन्ना
झारा गेरि ल्हागाब लाजि ।
ग्याप्पा स्होजि । 
पिपा स्होजि । 
भरिया स्होजि । 
ए क्रेबा गाडी
भीमफेदीहेन्से दरबारदोना काप्जि ।
चुह्राङ्बा ताम एला ऐनरि ब्रिमाहेन्से
ङा दोचिबारि आखाम्नि
हिन्ना, ङा ग्लेवादी दोचिबारि आखाम्नि ।
फ्यबारि म्हाइजि
ङाला ग्योइ
धर्म
रिमठिम, संस्कृति, परम्परा
ओसेम ङोसेबा । 
तासाइ खाइमाइ सफल आतानि
नुप्ना लाबारि । 
इमानदार मुबा ङाला पुर्खा
पक्कान कमजोर आरेमुबा । 
थेतासिमि सोना लासि बाजि
ङाला ठिमजुगु पुस्ताछादोना । 
ङाला अंशरि परतिबा
ताम्बाला काइरान स्याप्माहेन्से
ङा दोचिबारि आखाम्नि
हिन्ना, ङा ग्लेवादी दोचिबारि आखाम्नि ।

दोःबा : यकिना अगाध