ल्हुइला गिक्छा प्रहररि
आमा बिबा काइ थोन्बा लिच्छा
टुकु टुकु ब्राबा चुबान छ्यामरि
आमाला स्ह्यामाला कुनि चुङ्सि
दोबा हिन्ना दिम ङामला छ्योर्तेनरि
कोन्ज्योसोमदा म्होइगो लाबरि ।
आपाला या चुङ्सि
ङाम्लान लोप्खाङरि
क, ख डोबारि निमा
जिन्डा सोमरि दोबा लिच्छा
डोबारि चुबा हिन्ना ङाइ
‘राजकुमार थेन निमको पात’ बिबा राप
थे ग्यामसेन सेबा हिन्ना ङाइ
साङ्गे च्योमदान्देदा ।
आखे लामासे दोमाङ डोमा
साङ्गेला कुदा ङ्हाच्छा थान्सि
सम्भोटा लिपिरी ब्रिबा
छ्योइ त्रिपिटक डोबा म्राङ्मा
थेनोन दुइ ह्यान्से दोबारि सेम ताबा हिन्ना
ङा बुद्धिष्ट ।
ओम हिगिरि ब्रिबा हिगि ह्राङ्बान
खाइमाइ आम्ह्युना लासि टिबा हिन्ना
ङाला क्रास्यारि दिमागरि
हिंसा लाला आदे बिबा छाप ।
लासिन टिजि हिंसाला लिब्रो
नाबान खाजि सामन्त शासन
एसे ङान्दा डोबान लापुङ्जि धर्म लातोला बिसि
ङानिसे गोनोन गोला आखाम्जि
धर्म ह्युल्बाला लागिरि अफिम बिबा
ङानि अफिमरि ङ्ह्योइसि शोषण नासिन टिजि
खाइमा ङानिसे गोबारि चुजि
थे दुइरि साङ्गे च्योम्दानदेला
शान्तिला मोलाम पाङ्बान
तुम्बाक पुइबा दुइ खासि जिन्बा टिम ।
ब्यान्बा थेन ह्योलाबा आता बिबा थाहा मुनामुनान
फोइथान फो नाला आखाम्ना
धार्मिक आस्थादा कुरि थान्सि
यादा तुम्बाक, फोइदान फोदा गोली स्हेङ्सि
ब्यान्बारि चुबा हिन्ना शोषक सामन्तीला दरबार ।
मिलान ओन्छङरि
जामेकोला बलात्कार ताबा म्राङ्मा
सेमरि शान्तिला ङा (मन्त्र) किन्सि
ङ्हार्बान थोन्बा हिन्ना
सिलमङ तलवार थोसि
बलात्कारीला प्रतिरोधरि ।
सरकार !
एसे तामझामला छ्यामरि
ठ्वाङ्सेन लाबा धरहरा च्योदो ग्याम्से
म्राङ्ला आखाम्बा साम्हि
एदा ङ्हाम्बा साब्राला जाजुबा उम
ङाला ङोसेबा ङाला रिमठिम छ्योर्तेन
एला धरहरा बिमा खालाङ माबा मुला ओम ?
हिन्ना, ङा थेनोन छ्योर्तेनला ग्रान फाबान
छार सामन्तवाददा नुप्ना (ध्वस्त) लाबारि
छार खलनायक कादेदा ब्रेना लाबारि
ङाला ह्युल्दा सोना लाबारि
तुम्बाक थोबा साङ्गे च्योम्दानदे तासि
शान्तिला मोलाम गोली स्हेङ्सि
थोन्बन मुला
ॐ मुनि मिनु महामुनीया स्वाहा
छार रणकौशल थोसि रणचेरि ।
तपाईको प्रतिक्रिया दिनुहोस