तिगाइ थेह्राङ्बा संकेत पिन्छेला मुला
थेसे ह्राङ्दा सोनालासि बाउ–सोनालासि बाउ बिजिबा तााला । 
ह्राङ क्युइगे लाबा
ह्राङ प्लेन ताइलाबा गुनासो लाला
गिक्छा रेम
दा ग्याम्से ह्रो फेबाला स्हु उन्ना
क्य्राक–क्य्राक..... !  काइ पिन्ना
कडि थेन भाटाजुगुतेन सम्बन्ध टाङ्बाला क्रान्ति उन्ना
च्वाट–च्वाट–च्वाट.... !
चुह्राङ्लासिन व्यक्त लाला
ह्राङ छानोग्याम सारि ताइबाकेन लाबा राप
ताइजिन्माहेन्से ह्राङ्ला अस्तित्व थुम्ला बिसि लोङ्सि
खाम्देदोना हारगुहार लाचिबा ताला । 
छानो ताइबा ङ्हाच्छा
चु मुसे नोन स्हु उन्ना
ल्हाउ
गुुर्सिकेन निबा म्राङ्जि बिसाम
ज्याबान मुला बैसाखी पिन्ना ओम ताला
क्रिङ्बा काइ थेजि बिसाम
निला च्याङ्ना मलमपट्टी ल्हागाब लाबारि 
तासाइ तिक्खुरि ताइजि बिसाम छानो
बोगे लाबा सेमरि सान्त्वना पिन्बाह्राङ लासि
घाइते नाबादा मानखाङदोना दोना लासि
क्योन्बा ह्राङ्लासि
अझ पाङ्गे कि
क्राबाकेन लाबा बिजाबुमोदा
सुन्तला केकेबा पिन्सि तिलाइ दुइ व्हाम्बाह्राङ
समवेदना पिन्बारि आम्याङ खालाइसे । 
दशा ल्हागतिबा रे
समस्या धुरिग्याम आक्रिङ्ना फाप्ला
ओम विपत्तिला भयानक म्हाङ्गुलिरि परतिला । 
छानो ताइबा ङ्हाच्छा 
चेमोचेमा फेबाकेन लामा मिख्लि ताइना लाबाह्राङ
लिच्छाला रेम कुरि ख्वाइबाह्राङ
ख्लासि निबासे नोन दोसि च्याला कि बिसि 
मि तिबाह्राङ
चेगाइ उन्बारि स्याप्ला ओम छानो ताइबा ङ्हाच्छा । 
मरिण गाउँपालिका –३ बरुण, सिन्धुली ।

दोःबा : यकिना अगाध