केवाला
किलकिलेरि डान्बाला फन्दा ल्हागाब लासि
फेबासे तिबा स्हुसे
अनकन्टार मरुभुमिसे ख्वाइबा निर्जन पठाररि
ख्लाबारि आम्हाइबा
तासाइ ख्लाबारि बाध्य ताबा
क्रेसि मेफ्रा दोबारि जेक्खे लेङ्बा घाइते सेमजुगुसे
म्लेबारि आखाम्ना डान्चिबा मुला ।
आपा थेन आमादा
ह्राङ छार्बा दिम ख्राङ्गादा
बेल्बो–गोनेला
झरीतेन बाम्सि थाबा मैजारोजुगुदा
ल्होलो ह्राङ्लाजुगुदा
थारेङला ङोआसेबादा
ङामला दुस्मनजुगुदा
केवानाङ छ्याम नोन केवा थाला बिबा ल्हुइह्रोदा
भौतिक लिरि खाइमाइ ह्रुप ताआम्याङ्बा
जाजाबा अबोध कुला जामेदा ।
०००
म्राङ्ला फिरग्याप ह्युलरि मुबासे म्हुनारि छ्याम नोन खाबा
ङोआसेबा म्हुनाला म्हाङ्जुगुरि
बुकी थेन प्याउली म्हेन्दो सार्सि गाङ्नोन म्हेन्दो दोबा मुला
फलेदोला डालीदा ह्रोल्याङ स्होसि
कोइलीसे कोबाकेन लाबा
काफल मिन्सि चरी ख्युरख्युर स्याबा
बेली थेन चमेलीसे पेसि पेसि
या नाङ काफल थोसि ह्राङ्ला ङामरि खाबा
उफ !
खुमला अलार्म बोमो खासिकेन ङ्ह्याबा छेर्बा काइतेन
गाङ्साल म्हाङ ओम आछ्योबा निद्रादा
थान्सिमाम छोर्ला
ओम दोसि तिर्याम सररर
ह्राङ्लान ग्लाला ल्हानान तामदा
डान्सि चिला ।
डान्बारि सोचिबा सेमजुगुसे ।
०००
क्यार्से ह्राङ्लान नाम्सा, ह्राङ फुइबा नाम्सारिक्यार
बेली थेन चमेली
सेम खि किन्सि निबा शरद थेन बसन्तला डान्बारि
आख्लाना देउरालीरि फाबा ग्रान
आम्लेना थान्बा भाका
डान्बान डान्बाला वानरि
डान्बाला चेगाइ कली छार्ना लाबाकेन मुला
तोर गाङ्ला जो मुहेन्से जाकि दिरि मुबा
दाङ्बोला चेगाइला वानरि
ख्लासि निबा ह्राङ्लाजुगुदा
डान्सि
चुर्से उराठ मरुभुमिला तिङ चाल्सि छ्याबा
ग्रेन सागरला गुरि मुबा बगररि
वसन्त थेन शरदजुगु
बालुवारि ब्रिबाकेन मुला
सेमरि म्हान्बा सेमला तामजुगु
ख्लासि निबा चेमोला चेगाइला तामजुगु
ब्रिना ब्रिनान
समुद्रला छालसे फ्यापिन्ना थेसे ब्रिबा तामजुगु
थेतासिमि
फ्यासि फ्याआखाम्बा
डान्बारि डान्चिबा मुला
डान्बारि सोचिबा थेनि ।
दोःबा : यकिना अगाध
तपाईको प्रतिक्रिया दिनुहोस