ख्राङ्गारि थाङ्मो सुन साङ्गे
ग्राम्बा तेन्सि व्हाइ पाङ्गे
रानोन छाइले म्हेनोन छाइ
व्हाइग्याम तामगि थेना लाइ ।
चाकु स्योङ्ला ङामङामरि
घिसिङ थेमेला दिम मुला
म्हाला बिसि आख्लाना तेन्जिबा
आखे म्हेमेला ठिम मुला ।
ङ्हाच्छा घिसिङ आखेनि
नाचगाङ ग्यामसे फेप्पारो
कुपिन्टाररि दोखासि
म्राङ फ्यासि कोल्दे ड्वाबारो ।
जुरेग्याम ज्यार्ति मार फाप्सि
रा मामातेन बु देप्जिम
थानथान घिसिङ तोर क्रेसि
धनमनारि म्राङ फ्याजिम ।
साउरे जुरेला स्यारपटि
भुरुङगेला दिथेङा
राछो गाङ्से छेप रोइबा
कुपिन्टारला फिथेङा ।
हात्तिला ग्योइरि दिम स्होसि
धनमना नाम्सा मिन थान्जिम
थिङ थेन घिसिङ डिक्सिमाम
नाम्सा जेना लाथान्जिम ।
पड्कि स्युइबारि निबाकादे
मार ग्यागरसारि स्ह्युचिजिम
ह्रोन्ना ज्योज्यो आले छ्योसिमाम
ह्रोन्नान ह्युल्बा स्होथान्जिम ।
धनमनाग्यामसे फेबा घिसिङ
हरिपुर हरिवन श्रीपुररि
ह्राङ्ह्राङ्ला दिमनाम स्होसिमाम
डिक्सि चिजिम चपुररि ।
लाबोनगि तेन्बा घिसिङ थेमे
ल्हानान ग्लारि प्लिङ्जिन्जि
ङ्हाच्छाला राङबा ताइ आरे
दत्तेमि ज्यानालासि छिङ्जिन्जि ।
बोम्बोला दुदुम लामाला छ्योइ
कादे डिक्पा ताम्बा म्हेमेला ग्युइ
छ्योछ्यो ठाम्सि स्ह्युसाइनोन
तामाङ न्हाङ्लान घिसिङ ह्रुइ ।
टुङना डम्फु सेलोला जो
रिमठिम आखे म्हेमेला ङ्हो
ग्योइसेन ह्याङ्दा ङोसेला
म्लेबा ख्लाबा थालाउ रो ।
पनौति, काभ्रे
(छिगला अर्थः थाङ्मो– बिस्कुन, ।)
तपाईको प्रतिक्रिया दिनुहोस