ङामग्याम्सेन खाइमा सुपम्हाला दिनि
आफे ज्योइ ख्लासि निबा लानि नोन,
जिन्ला सुमधुर काइजुगुला बसन्त
डेला ग्यामह्राङ्बा काज्याङ्जुगु
गोइजिङ्ला आङरे डेसि फाप्ला
कोम्हेन्दोला लाग्र्युङ म्हाङ
गिक्खे स्हुह्राङ छ्योङ्चिला
सहरला गल्लि गल्लिजुगुरि ।
ल्हुइ ब्योङ्बा हिन्साम कोम्हेन्दोजुगु स्योङ दोसेला
ल्हुइ छ्याबा हिन्साम कोम्हेन्दोजुगु युङ्बा दोसेला
तासाइ थेनिजुगु न्हा स्योङ दोजि न्हा युङ्बान
ताजि जेक्खे ह्राङ्लान ल्हुइला कठघराला गिक्खे साक्षी
ब्योङ्चिबा बेइन्साफि दुइला आङ्सि
याबेङ स्योङला गुरि रुइचिजि
मुतेबा देन्बाला लागि
सोसिचिबा गिक्खे आब्रिबा दोङराप ।
ओस्बा ओस्बान
ह्याल म्हाइबान निमा सहररि
कोम्हेन्दोजुगु झनझन म्लाङ्गाइ ताला
ह्राङ्लान गाला क्रिपरि
सोसिचिला गिक्खे सादा म्हाङ
ङेसिचिला पिङ्गाइ जस्ताला दिम
म्हाइसिचिला म्हान्ज्यानाङ ताङ्बा
फालछेप्ला मि दुककाम्बा डुइग्याम्से
मिख्लि मिख्लिला ग्योइरि...
बाम्सिचिमुला खानाङ चु ह्युलला आङ्सि ।
पाङ्आखाम्बा दुइला गिक गिक ज्योइ
म्ह्युबा मुला कोम्हेन्दोला मिरि
ब्लोबा मुला दुइलान लि,
नाम्साहेन्से सहरदोना स्योन्दोलोङ म्हेर्बा म्हाङ
थेन म्हाङजुगुला आब्लाप्बा ल्हामरि
कोम्हेन्दोजुगु याखारगिन ल्हुइरि
ल्होलो ल्होलो ल्हुइ सामचिला ।
तिला चु आजेबा दुइदा स्योइबारि खाम्ला
कोम्हेन्दोला मिसे ?
थे स्हुला चरमसिमारि नोन ह्याल ताजिला ।
तिला चु डिछ्या पोबारि खाम्ला
कोम्हेन्दोला कुक्पा काइसे ?
थे दिङ दिङहेन्से ङ्हारबा छुमचिमुला ह्राङ्बाङ्ला ।
कोम्हेन्दोला बाम्बा मि
सातान सातान बसन्त च्याला
धर्गोगि ओन्छुप कुसि
दिङ दिङहेन्सेला आतोङ्बा म्हाङ
हाङ्सु ह्राङ्बा लानि स्योपन्हाङग्याम
खाइमा ताइला ताला
डेसि तोङ्जा म्हाङ
तरबारला स्युपह्राङ तासि खाइमा ताइला ताला ?
दुइला ख्राङ्गारि
कोम्हेन्दोलान ल्हुइ किन्सि
ङाला प्रिय कोम्हेन्दो ।
हेल्सि रहरला ब्याप
टाङ्सि सकसला कजुगु
लुङ्दारह्राङ ए
ह्राङ्बाङ ल्हिप्चिबा च्याबा सेम मुला ।
(छिगला अर्थः स्हु– दुःख/पीडा, स्वतन्त्रता– ह्राङ्बाङ, स्योन्दोलोङ– लमतन्न, आतोङ्बा– कहिल्यै नसकिने, क– वचन ।)
दोःबा : यकिना अगाध/ईन्द्र तामाङ
तपाईको प्रतिक्रिया दिनुहोस