ल्हानान थाजि आम्हेर्ना म्हुनजुगु  !

निन्द्र तिल्दा मुग्याम खाइ चोननिसि थारेङ ताबाकेन मुबा । म्हाङ्जुगु कोठाला सुनसान डेङ्दा ब्रेबाकेन मुला । थेतेन फेबासे ङादा तोसोगिला ताइ मौनरोगी स्होबा मुला । ङादा जागि सुताइ ताम लाइम्हान्बा आरे । ङा सुनसान, एकान्त दोबा मुला । तिलाइ आम्राङ्बा म्हुनाला ग्याम आरेबा ह्रिह्राङ्बा । सान्त्वना थेन समवेदनाला ओइरो ल्हागतिबा मुला । ल्होलो थरिला म्हिजुगुला ल्होलो तोसोला सान्त्वनासे ङाला क्रास्यादा छ्यालछ्योल लापिन्बा मुला । तिङ सारि ताइसि दोसि कु क्लेसि खालाइसे न्हाङ्रि खाँदतिसि थान्बाह्राङ ताचिमुला । मि हिन्ना व्हा क्युइला मुहान फेबारि गाह्रो ताबा मुला । सार्गे लाबा म्हेन्दो ह्राङ्नोन केवा साम्सि ताइसि निबा म्हेन्दो दोबा मुला । ताम पाङ्बारि सेम ल्हागतिबा आरे । 

ग्रुङ अनशनरि चिबा मुला । छारिब्योन ख्रेन्बा शोक दोसि बिरहला ब्लेनाङ सार्बारि म्लेबा उन्यौ वान दोबा मुला । ङाला ख्यारख्युर मुला ल्हानान म्हिजुगु । तासाइ थे आरेना छ्यामरि मुबा म्हिजुगु छोर्बाकेन मुला बिरानो–बिरानो । 
स्हु ङाला काज्याङरि ब्योङ्बाकेन मुला काला बोरि । आम्राङ्बा पोर दुमतासि (सैन पल्टेर) खाइमाइ आफान्बा पोर दोबा मुला । मिख्लि बर्खाला फ्रुम ह्राङ्नोन ताइला श्रावण ह्राङ गोर ङ्हि मिला बाँध बोसि । 

चोट ल्हानान नुप्बा मुला, ङाइ चोट वेवास्ता लाबारि आखाम, ङाला सेम च्यातच्युत निबा मुला । ट्राफिक आरेबा राजमार्गला दुर्घटना ताबा सावारी साधन ह्राङ्लासि । 

ङा ख्यासि (छलेर) ह्यार्बारि म्हाइला । थेला वियोगसे बोल्ना लाबा दुइजुगुग्याम तासाइ दुइसे ङाला वास्तविकताला न्हाब्याङ चुङ्सि नाचिबा परिवेशला दलनरि दोगाना लाला । स्हु थे आच्याङ ।

थे देन्बान सिसि सिबा मुबा । तासाइ ङा सोसि नोन छोन्बो छेन्दे (लास) दोसि सिबाकेन मुला ।  

ह्रुप ताबा याखारगि संयोगला दिनि दोसि फेबा मुबा । ङानि ङ्हिला केवा (जीवन)ला तिरेकुनुला स्ह्योतेन छ्याम । तामझाप आरेबा नखरा आरेबा ताङ्सि स्वीकार लाबा मुबा । परिबन्धसे स्हेङ्बा ज्याबा सम्बन्धदा । सुख–स्हु (दुःख) ला डोबजुगु दाङ्सिकेन ल्हाम जारी थान्बा मुबा केवाला । आनुब्बा (अनन्त) कोरा थारेङ्ला कल्पनाला ह्युलरि छार्बाकेन लाबा सफलताला लागि ल्हुइ, सेम फुल्सि । 
थे प्राची ।  

कर्णालीहेन्से म्हाङ म्हाइबारि याम्बुरि फाप्बा । ङेङ्गोरला छ्याम ल्हानान थारेङ्ला छार शहररि म्हाइबाकेन लाबा छार छार म्हाङ्जुगु । म्हाङ्जुगुतेन डुइसिकेन खाबा ल्होलो काम्बा–ज्याबा यथार्थजुगु । क्योङ्ला क्योङ परिवेशजुगुदा स्वीकार लासिकेन, सम्झौता लासिकेन ङोआसेबा शहररि गोल्छे गोल्छे ङोसेबाकेन मुबा प्राची । 
छार ग्लाला छार छार म्हिजुगु स्याप्बा ताङरि ङा छार म्हि तोइबारि दोजि थेला रेगे (दैनिकी)तेन । थेला रेगे, स्ह्योरि कलेज रेरि याखारगि प्राइभेट कम्पनीला जागिर । 

डोबा ग्लारि ताबा मुबा ङान्ना ह्रुप । ङान्ना ह्रुप कक्षा कोठाला ह्रोरि सीमित ताचिजि तिलाइ दुइ । ह्रोबिमा फिला सम्बन्ध कायम ताना लाबारि ह्रोपिन्बा मुबा थेला दिङ्से, ङाला दिङ्से । दिङ्तेन छ्याम परिपक्व ताबा ङानि ङ्हिदा भौगोलिक दुरिसे तिलाइ अप्ठ्यारो ताना लाबा आरेमुबा । ङानि गुङ्ला सम्बन्धदा म्हि म्हिसे स्होबा जातीयताला आङ्गासे तिला बिगो लाबा दुस्साहस लाबा आरेमुबा । थे खसान राज्यला खस क्षेत्रीला सन्तान मुबा । ङा (याम्बु) ख्यारख्युर मुबा ताम्सालिङला ओन्माला जनजातिला नासो । ङानि ङ्हिला फेबा पहाड ह्राङ्बान नोबा मुबा । पाङ्बा ग्योहेन्से तेन्बा रिमठिम । तासाइ ङान्ना ल्हुइरि ब्योङ्बा का वाला मुबा ओस्बान ओस्बान । थे थेन ङाइ बुन्बा बु ओस्बान मुबा । थे थेन ङाइ दुबा दिनि याखारगिन मुबा । थेसे सोबा ङाइ सोबा केवा ओस्बा ओस्बान मुबा । चुह्राङ्बान तामजुगुदा साक्षी थान्सि ङानि ङ्हिसे चेगाइला व्हारारि केवाला म्हाङजुगु सार्ना लाबा बाङ लाबाकेन मुबा । 

ताजान मुला डान्बाजुगु । डान्बाजुगुसे दोसि दोसि ङाला ग्रोप्ला । तिलाइ दिङ ङ्हाच्छाला ताम । ङान्ना गिक्छारेमला डेटिङ । ङाइ निबा ग्ला दाम्बा मुबा बिसाम थेसे तिथिमिति । ङ्हिलान सहमतिरि निसेला ताजि याम्बु ङामला रमणीय ग्ला धुलिखेल ।

बेने (फागुन)लाला गिक्छा कामरेकुनु ङानि ङ्हि नोन योरि ७ ङ्ह्यामा चाबहिल चोकरि ह्रुप ताजि । चक्रपथ कोर्सि खाबा मयुर यातायातला बस ङान्ना ङामरि खासि थेनताजि । ङानि ङ्हि बस क्रेसि निजि धुलिेखेलरिक्यार । केवाला गिक्छा चेगाइतेन गिक्छा डेटिङला ज्याबा अनुभुति ह्रुप्सि ।

अरनिकोला राजमार्ग तासिकेन बस दोखाङ दाङ्सि छ्योङ्चिबा मुबा । बस ह्राङ्लान रफ्ताररि कुल्चिबा मुबा । भक्तपुर, नालिन्चोक, साँगा भन्ज्याङ ताबान ।

बिमाह्राङ पाङ्बा दुइरिन बस दोजि धुलिखेल बसपार्क । बसग्याम फाप्सि ङान्ना ल्हाम वाङ्जि रमणीय धुलिखेल पार्करिक्यार । जेबा मुबा ग्ला । बस्न्त ऋतु पाडाम्हेन्दोला लि किन्सि सार्सिबा मुबा ह्रिनाङ वाफ्युर । ज्याङ मोहडारि राप्चिबा गौरीशंकर थेन गणेश हिमाल ङामरिन ह्राङ छोर्मुबा । चाङ्मा मुबा मौसम । ङानि ङ्हिला सेम ह्राङ्बान । स्याररिक्यार ल्हानान ङोआसेबा गाङजुगु पोक्च्योक तासि राप्चिबा मुबा । ङाइ ङोसेबान मुबा चु ग्लाला बारे । ङाइ पाङ्चिजि प्राचीदा चु ग्ल थेन थे ग्लाला बारेरि । थेसे ङ्योइबा ताङ्दा जारी थान्मुबा । ङाइ थेला जिज्ञासाला हल लामुबा । 

तोङ्जा चाम क्रेसि बुद्धला कु ङामरि दोसि ब्लेखचिजि । ब्लाप्बादा न्हासिमाम । ब्लाप्बा न्हासिमाम सुस्केरा युसिकेन गाङनाङ सार्बा पाडाम्हेन्दो च्योबारि निजि । 

सेम चंगा ताबा मुबा । नाम ताइमाहेन्से ठ्वाङ्बा मुह्राङ्बान । ठ्वाङ्बा मु दिरि जेबा प्रकृतिला कुरि लुटुपुटु तासि ताङ्से क्लाङ्बाकेन मुबा सेमला म्राप । सेमहेन्से सेम दोना सेमला ताम दोप्बाला लागि ।  

सेम ङ्हिला वार्तालाप । केवाला बारेरि मुबा । लिउरि स्होसेला म्हाङ्जुगुलाफिरि मुबा । थेला ङ्हाउला बारेरि मुबा । ङाला ङ्हाउला बारेरि मुबा । काल्पनिक आदर्शला बिमा वास्तविक यथार्थला बारेरि मुबा । थेसे मुला लानि–सार थुपिन्ना बिसि पाङ्बा आरेमुबा । ङाइ नोन ग्रेन म्हाङ्ला महलरि दोना लासि बोक्टो केवाला दर्शनला ताम लाबा आरेमुबा । 

तिगा कादे तामजुगु ताबाकेन मुबा ङानि ङ्हिला गुङरि थे मुतेबा ङान्छे नाबा अनुभव थेन म्राङ्बा देन्बारि आधारित तामजुगुन मुबा । 

ताम नोन तामरि दुइसे दिनिदा न्हुपला क्षितिजला गाङरिक्यार दोना लाबा थाहान आतानि । ख्रेन्बा–फुइबाला क्योइताम लाबारि सुताइ म्लेसि ङानि ङ्हि चोदे ल्हाना म्हाबारि दोजिम कि चेगाइ थेन केवाला बारेरि । थे तिरेला तिगाइ दुइला चिबा दशक दशक तासि सोबा मुला । 

ङानि दोसि खाजि । फिक्का सम्बन्धरि चेगाइला लाग्र्युङ छोन फोर्सि । च्गाइला बारेरि पिरतीला ज्याबाथाङ छाम्सि । ल्हाम ल्हानान थारेङ्ला आरेमुबा । याम्बुहेन्से छ्योआछ्यो तीस किलोमिटरला हिन्ना । निबाकेन लामा ब्योन दिनितेन निबा ङानि दोसि खामा दिनि खेप्पा दोसिकेन निजिन्मुबा । थेनोन खेप्पा दिनितेन, बसला रफ्तारतेन बनेपा, साँगा तासिकेन वाङ्बा मुबा उपत्यका । बिले ह्युलला राजधानी । 

ङ्यासे दुइला याम्बु म्राङ्मुबा जेबा । नागार्जुन गाङ्फिरि ल्हागाब ताबा पाबा खासुला धर्सो मुरि दोबा चामह्राङ छोर्मुबा । साधनला स्युगतेन दोगाजि दोखाङरि । दोखाङरि दोगामा खानाङ खानाङमि नाङ्साल लुङ्बारि चुजिन्मुबा । 

थेदा चिबा ग्लादोना सापिन्जि । ह्राङ दोसि खाजि ह्राङ्ला डेरारि । दोसि दोसि ह्रुप ताबा ग्रान फासि । देबाः लासि चलप ताचिबा मुबा ङानि ङ्हिला केवा । सोबाकेन लाबा अरबौं केवाह्राङ । थेसे जाजाहेन्से ग्रेनदोनाला ताम ङातेन मुतेबा तामसेमुबा । ङाइ नोन मुतेबा तामसेमुबा थेतेन । ङानि ङ्हिला केवा संघर्षमयी दुइरि मुबा । लिउला योजना स्होसिकेन डोबा ओम दातेला दुइरि ह्राङ सोबाला लागि लाबाकेन लाबा कर्म । ल्हानान ब्यस्त मुबा ङान्ना केवा । 
ङान्ना सम्बन्धफिरि थेला दिमम्हे ओम ङाला दिमम्हेदा थाहा मुबा । ङानि ङ्हि गुङ्ला सम्बन्धरि न्हा स्वीकार नोन मु न्हा अस्वीकार नोन । ङ्हिनोन दिमम्हेला याखारगिन ताम मुबा । डोबा ब्रिबा मुला । तिगा सेम निला थेनोन लाउ बिबा तुन्बा निर्णय पिन्बा मुबा । 

दिमम्हेला गुङ्ला तामदा सेमरि किन्सि थेन्नाइ सेम आक्युइगाइ बिबा म्हान्सि आउदिन मिहेनतला छ्याम ङ्हाच्छा बोर्बाकेन मुबा केवाला ल्हामदा । सुख स्हु दोप्सिकेन । 

बर्षाद ऋतु नुप्सि शरद ऋतु फेबाकेन मुबा । मु ठ्वाङ्बा मुबा । ह्रि, ब्ले, ब्लेहुइ नुवाइ तिसि ताजा तासि ज्योबाकेन (सजिंदै गरेको) लाबा ब्योन ह्राङ्बान म्राङ्मुबा । तिगाइ दिङ ङ्हाच्छाला ग्रेन प्रिबा म्हेनिङ तिहार नाम्सादिमला गाड्टारिक्यार सयपत्री, मखमली, गोदावरी दोसिमाम सार्बा तरखररि मुबा । 

प्राचीसे थे दिङ्ला म्हेनिङ तिहार दाङ्बारि दिमरि निसेला ताम तिलाइ ला ङ्हाच्छान ङातेन लाबा मुबा । ङाइ थेला ताम आङ्यान्बा ताम आखानि । तासाइ ङा थेतेन छ्याम थेला दिमरि निबारि सम्भव आरेमुबा । थेतेन ङाला ल्हुइ निबारि आम्याङ्साइ नोन सेम थेतेन पुइबा पक्का मुबा । थेतासि ङा स्हुरि आरेमुबा । थे दिमरि निसेला रे ताङसे ङाम ङाम खाबाकेन मुबा । 

तिलाइ तोबा स्हेला सपिङ लाजि । थेदा सेम निबा छोनला कुर्था सलवार । आपा आमादा तिगाइ उपहार । थेदा तोबा तिगाइ कष्मेटिक सामान ल्होलो । 

सेम आउदिन स्हुखाबा मुबा । चोट आरेनान । नाईटबस क्रोसि थे निसेला मुला ङा गिक्खेदा ख्लासि । 
थेकुनु थे निसेला रे ! ओस्सो ओस्सोन बिरहरि थाजि । ङ्यासे ताबा ङ्हाच्छा थेदा साबारि छ्याम नोन निजि बसपार्क दोना । ग्यालाम नाङ ओदे ताम आलानि । ङ्हिलान मौनता नोन काफी मुबा, दोसि ह्रुप तासेला का (वचन)ला छ्याम फेबा परिवेश । 

बस क्रेसि थे निजि । ङा तिलाइ दुइलिच्छा दोसि निजि थेग्याम्से थेसे थुर्मा खाबा याखारगि ज्याबा तरंगदा कल्पनानाङ ह्रुप्सिमाम । 

थे दिमरि निमाहेन्से ङाए ह्राङ्ला केबाला नाम्सारि म्हेनिङ तिहार दाङ्बारि जाजाकि थेला डान्बादा खि लाबा ताङ्बा थोसिमाम निजि । दिमम्हेरि मोक्कोन ताङ्बा मुबा । 

तासाइ ङा ओदे ताङ्बारि आखाम्नि । प्राची छ्याम मुबा हिन्साम कादे ज्याबा तासेला मुबा । तासाइ चुह्राङ ताबारि आखाम्नि । 

ङान्ते ब्रान्बा बिमा स्यान्दो विकल्प आरेमुबा । भौगोलिक दुरिसे ङानि थारेङ तासाइ नोन आइटीला दुनियाँसे ङानि ङ्हिदा ङामरि स्होबा मुबा । 

ङा ह्राङ्नोन क्यार्से थेए स्हुखासि चिबा ताम थेनालामुबा । स्हुखाबा दुइदा योनान ह्रुपतासेला तामसे ताङ्ना लामुबा ङानि ङ्हिदा । 

म्हेनिङ तिहार जिन्जि । थे खाबा रे पक्का लाजि थेसेन । फलना रेला चोदे ङ्ह्यामा बसपार्करि ङादा किन्बारि खाउ होइ बिसि ब्रिसि पुइगाबा म्यासेजसे ङा आउदिन ताङ्जि । 

थे दोगाबा बिमा ङ्हाच्छान ङा याम्बुरि दोगासि ह्राङ्दलान रेगे (दैनिकी)तेन ब्राबारि चुजि । तिरेकुनुला  ङ्यासे ङाला मोबाइलला इनबक्सरि म्यासेज खाजि । 

म्यासेज प्राचीला मुबा । ङा दिमग्याम थोन्जि, न्हाङ्गार नेपालगन्जरि दोगाला । ओम रेनिङ स्ह्योरि याम्बु । 
ङा ताङ्जि । सायद थेए नोन ताङ्बा मुसिम । ङाइ ब्रान्बारि चुजि थे रेनिङकुनुला स्ह्योदा । थे स्ह्योसे ङादा ङाला केवाला माक्कोन बिमा चेगाइ बिम्ह बासि खाबाकेन मुबा । 

फोेन लाचिजि रेमरेम खानाङ दोगाजि ? खाराङ्बा ताबाकेन मुला ल्हाम बिबा जानकारी किन्बारि । 
खाइमाकुनु थे याम्बु दोगाला बिमुबा छ्योआछ्यो थे म्हुना ङा म्राङ्सि ङ्हुबा ह्यार्बा मुबा थारेङ । ङाइ रेमरेम कल लामा खाइमागिमि थे बोमो खामुबा– कादे कल लाबा बिसिमाम । ङा थानकोट दोगामाहेन्से फोन लाला ले बिसि बोमो खामुबा । 

थेला तामसे तिला थुर्से ले ङादा ! ङाइ रेम रेम लाचिजि फोन । 

लिच्छाला रेम ङा मुगलिन दोगाजि बिबा मुबा । थेलिच्छा नोन फोन लाबाकेन मुबा ङाइ । तासाइ फोन तिक्खुरि  स्विचअफ बिबारि चुजि । म्हान्जि मोबाइलला ब्याट्रि जिन्जि ताला । 

थेलिच्छा म्हेर्बा बाङ लाजि छुप निजिम । 

जाजाकि म्हाङ म्राङ्जि । म्हाङ आउदिन आज्याबा मुबा । थेनोन आज्याबा म्हाङ्ला कारण ङा छोर्जि । स्ह्यो ताबाकेन मुबा । 

रेसि चिया स्होसि थुङ्जि । ओम दोसि थेदा फोन ट्राइ लाजि, फोन दाते नोन अफ मुबा । 

सेमरि तिगा तिगा ताम क्लाङ्बारि चुजि । थेह्राङ्बान सेम थोसि बसपार्करिक्यार निजि । ग्यालाम नाङ ह्रुप तागाइ बिसि लाथानला लादा सेमरि ज्याल्सिकेन ब्राजि । 

बसपार्करि दोजि । याम्बु ग्याम माङ्ग्यार निबा बिमा याम्बुरि खाबा यात्रीला भिड खचाखच मुबा । तासाइ ओदे ल्हाना खचाखच भिडरि ङाला गिक्खे चेमो आरेमुबा । 

क्यारक्युर च्याजि । सुदुरपश्चिम यातायात व्यवसाय बोर्ड ब्रिबा काउन्टररिक्यार निसि ङ्योइजि । नेपालगन्ज ग्याम खाबा बस आदोगाजि ज्योज्यो ? तिगाइ ताम आपाङ ओम पाङ्बारि नोन न्होर ल्हागतिला ह्राङ्लासि ङोसेबा पिन्जि । यातायात व्यवसायला कर्मचारीसे । 

ङाइ ब्रान्चिजि । किन्बारि दोगाउ बिबा म्हिदा । चिया थुङ्गे म्हान्सि याखारगि चिया होटलरि निसि वाङ्जि । चिया ह्रिजि । मि होटलला डेङरि च्योबा डेङ टेलिभिजनरि दोजि । स्ह्योला तामसोर प्रसारण ताबाकेन मुबा । तिक्खुरि चुह्राङ्बा तामसोर खाजि थे तामसोरसे ङाला तिङ फिर्सि स्यान्दो दुइला बिमा दोब्बर तानिजि । 

‘नेपालगन्ज ग्याम याम्बुला लागि खाबा यात्रु थोबा म्हुनाला बस धादिङ जोङला दरौती स्योङ ङामरि दोगाममा दुर्घटना तासि त्रिसुली स्योङरि ताइजि । तिगाइ यात्री बिमा ल्हाना यात्री स्योङरि परतिबासे उद्दारला लागि कठिन ताबा मुला ।’

तामसोरसे ङाला चियाला फुइबादा सेजि । तिक्खुरि ङा दार्बारि चुजि । थेला आङाला फोन नम्बर ल्हागाब लाजि । लिसोजा थेनिकादे ङादा ङ्योइबाकेन मुला, ‘नाना दोगाजि ?’

ङाबिमा नोन थेनिकादे झान बेखबर चिम । ङाइ दोगाबा आरे बिसि म्यासेज लाजि । 

काउन्टररि निसि ङ्योइजि । क्योलोलो थाहा ताजि । प्राची क्रेबा बस दुर्घटनारि परतिबा चिम । साङ्ग्युर पुइजि थेला दिमम्हेदा । ङाए दुर्घटना ताबा ग्लारिक्यार निजि । 

थेरि दोमा सुरक्षा निकाय, गोत्ताखोर म्हाइबारि तयार ताचिबाकेन मुबा । घाइते यात्रीदा क्योन्बारि (उपचार गर्न) अस्पताल दोना लाजिन्बा चिम । सनाखत ताबा पार्थिब ल्हुइजुगु पिन्जिन्बा चिम । तिगाइ पार्थिब ल्हुइ थेरिन मुबा । तिगाइ दातेनोन त्रिसुलीला गर्भग्याम तेबारि खाम्बा आरेमुबा । 

ङोन्छाङ ह्रुप आताचिबा प्राचीला आपा, आङा थेन ज्योज्योदा ह्रुप ताजि । आमाजा दोगाबा आरेमुबा । म्हाइबा ताङ मुबा । बसला ल्हामरि मुबा गोर सोम बिमा मुतेबा यात्रीदा स्याप्जि । खालाइ छोन्बो खालाइ सिबा । खाइ तिगा बिसे ? थेनोन गोर सोमला नम्बररि परतिजि प्राची । सोमरे ब्लिरे दोना म्हाइजि । । तासाइ स्याप्बारि आखाम्नि । म्हाइसि आस्याप्बा आहिन । म्हाइना म्हाइनान आस्याप्बा । 

प्राचीला आपा, आङा थेन ज्योज्यो दिमरि दोसि निजि । सेमरि कादे स्हु थोसि माम दोसि निजि थेन्दान थाहा मुसिम । 

ङाए दोसि खाजि । म्हाइसि आस्याप्बा प्राचीला पार्थिव ल्हुइ त्रिसुलीदा जिम्मा पिन्सि । खाइ खाराङ्बा ङोबा ङोला परमात्मासे नोन कादे ल्हुइजुगुदा । सार्ना सार्नान सार्बारि आपिन्ना पुपुरिन सितोमुला बिसाम तिल्दा केबा पिन्ना म्हेन्दोला ? 

आशा थान्सि कोरो लाबा लाथानला कोन्ज्योसोमसे नोन आखाम्बा चिम म्हिसे म्हान्बाह्राङ्बा केवा पिन्बारि । असरल्ल मुला ल्हानान योजनाला खाकाजुगु । ङाला केवारि मुबा योजना आयोगला प्रमुख त्रिसुलीला चेमो जामे दोमाहेन्से केवाला ल्हाम बोबा मुला । 

ख्योल्सि खाबा म्हाङ्जुगुला छेप्बासे रेमरेम डोङ्बा करार लाबाकेन मुला । ङा सोसिमाम थेतेन सिबा मुला । थे सिसिमाम ङातेन सोबा मुला । 

ताला, कोठा, छिडि, ख्राङ्गा, मट्टान, बार्दली आरेबा खण्डहर जेक्खे लेङ्बा बोक्टो दिमला ताइ मौनता हिन्ना ङा । थे छोन्बो मुमा ङा बाठो मुबा । ङा थेन थेला बठ्याइरि सार्बा मुबा म्हेन्दो चेगाइला ! केवाला । आशाला । भरोसाला । 
थे निमाहेन्से ङा ताइ दोबा मुला । थेला डान्बा म्हाना लाबारि ख्रुसि थान्बा थेला तामआपाङ्बा फोटो ह्राङ्बान । 
पाँचखाल–११, शिखर कटेरी, बागमती प्रदेश ,काभ्रेपलान्चोक

दोःबा : यकिना अगाध