छर्ना लाचिबा खाइ कादेछा दिङरि मुग्याम
खाजिबाइ हिंस्रक जन्तुला फ्लाला ज्योइ
ल्हागतिबा मुबा थेला संवेदनशीलतारि
ङ्योइगो,
कुरि खाजिबाइ ह्रि जनावरला फ्लाला
ज्योइ दोसि ब्राचिबा जामेजुगुदा
एदा मोक्कोन बिमा लोङ्बा तिगा ताला खाला ?
ङ्योइगो,
योनीरि समाजला ‘मर्दजुगुला’ पेजाङ्ला
दोइ थोसि ब्राचिबा जामेजुगुदा
एदा मुतेबा बिमा बोमो खाजिबा दुइरि खाला ?
ङ्योइगो,
सार्वजनिक बसला
लिच्छाला सिटरि संवेदनशील
अंगरि ‘थुर्बा’ जामेजुगुदा
चु समाज एदा ज्याबा तिल्दा आछोर ?
दृष्य गिः थे मुतेबा जामेजुगुला प्रतिनिधि कासाल
तिङनाङ लोङ्बाला, बोमोला, फेलोङ्बाला (भय)
एन्जाइटी थोसि सोचिबा थे
दार्से निर्भिक दोबा मुला ।
दार्से काइ दोबा मुला ।
दार्से मे दोबा मुला ।
तिगाइ रे ङ्हाच्छा जेक्खे थेसे
क्योङओन्छाङ च्योपिन्बा मुला
कथित ‘थुर्ला आदेबा’ थेसेन
दाम्बा चेमोदा ।
थेसे सार्वजनिक घोषणा लापिन्बा मुला कि–
‘योगला साधना ह्राङ्बा संभोगग्याम
ङाइ केना लाबा सेम मुला चु युगला उत्तराधिकारी
ङादा थान्बा सेम मुला ह्राङ्ला पाठेघर ह्राङ्लान स्वामित्वरि
ङाइ छार्ना लाबा सेम मुला ह्राङ्लान चेगाइला ङ्या
ओम ङादा तिरन्तर पिन्बा सेम मुला ह्राङ्लान वंशदा... ।’
दृष्य ङ्हीः विद्रोहतेन लोङ्चिबा समाज
युद्ध ब्रेसि दोसिखाबा सम्राटला ह्राङ्बा लिरि
खि किन्सेला ह्राङ्बा, बोमो खाबा ह्राङ्बा, बेचैनी ह्राङ्बा अनौठो छ्योल्बा थोसि
म्हुनला सारला म्हेन्दोजुगु ताइबारि आम्याङ्चिमान
लानिसे ह्राङ्ला उकुसमुकुस
संवेदनाला फ्रुमरि ह्रुप्बारि आम्याङ्चिमान
समाजला ठेकेदारसे उर्दी जारी लापिन्बा मुला,
‘पाठेघररि ह्राङ्लान स्वामित्व म्हाइबाजुगु अराज हिन्ना ।’
क्योङओन्छाङ च्योबाजुगु ह्रिक्पा आरेबा हिन्ना ।’
‘चुह्राङ्लासि ब्राबाजुगु खानाङए आग्युर ।’
‘चुह्राङ्लासि तामलाबाजुगु कुलघरानारि आबोर ।’
कासालरि पाङ्पिन्बा मुला थेसे नोन कि–
‘एला ग्याप्पाला भुप्रान्हाङरि ज्योर्चिबा बिमा
ङाइ ह्राङ्लान इच्छासे केना लाचिम्याङ्गाइ आराजक जामेजुगु
ङाइ ह्राङ्लान इच्छासे दोचिम्याङ्गाइ ह्रिक्पा आरेबा म्रिङकाेला
ङाइ ह्राङ्लान इच्छासे दोचिम्याङ्गाइ ह्रिक्पा आरेबा म्रिङकाेला ।’
(छिगला अर्थः च्योबा– चुम्बन, चेमो– प्रेमी, ङ्या– वीर्य, सार– तारा, ह्रिक्पा– चरित्र, ।)
दोःबा : यकिना अगाध
तपाईको प्रतिक्रिया दिनुहोस