चु सेम क्राजि
ह्युलरि गे आयाङ्मा
प्रमाणस्योला उम पि ब्याङ्सि
स्योस्यो रि खाबा विज्ञापन च्यासि
पासपोर्ट थोसि मेन पावररि निमा
ल्हाना टाङ्गा स्होबा म्हाङ ओन्जि
‘फ्युक्पो दोला व्हा !’ बिबा म्हाङ म्राङ्जि
सेम फुर ताङ्जि ।
जाक्कि मुबा म्हार म्हुइ चुङ्जि
आयोबादा छे म्हाइजि या ताजि
पोप लाबा टाङगा मेन पावररि पिन्जि
तिनि बिमा न्हाङ्गार बिमा निबा दुइ खाजि
मिनाङ मिख्लि थोसि केवा ह्युल ख्लासि
फिरग्याप ह्युल निब हाउजातरि फ्याङ्जि ।
म्हिला ह्युलरि दोजि ग्योइ आगोजि
तोर निउ बिमा मार निजि
टिउ बिमा राप्जि, राप्को बिमा ब्राजि
आमा ह्राङ्ला जामेमि मिख्लिला ग्योइ छ्याना क्राजि ।
चाबा, थुङबा, म्हेर्बाला ठेगान आरे
दुद्डो ह्राङ डुइबा ग्लारि
लिच्छा लिच्छा ब्राजि
गोल्छेसे रे निजि, ला निजि, दिङ निजि
ङादाम टाङगारि ग्लुबा म्हि बिजि
तिला बिबा थेनोन लातोजि
न्हा सिबारि खाम्जि, न्हा सोसि टाङ्गा पोप्खाम्जि
साहुदा च्योल्बा दिम ह्वारि जिसि
केबा ह्युल खाइबिमा खाआखाम्जि
च्युप्सि थान्बा दुद्डो नोन स्होजि ।
थे तासि
जामेकोला फिरग्याप ह्युलरि खालाइ निला बिबा थेसाम
पाङ्सि पिन्गो ह्या
थोसि खाबा म्हाङकादे
म्हाङ्नोन दोला बिसि
थुबारि टाङ्गाला दोङ आरे बिसि
लुबा तामदा देन्बा थाम्हान्गो बिसि
खाबाम ङा तिरे खानोन खाला
बाकासरि खाला व्हा हाउजाजरि खाला
आमा ! ग्यालाम च्यासि आक्रागो ह्या !
(छिगला अर्थः फिरग्याप ह्युल– मुग्लान, स्हु– दुःख, । डि.)
तपाईको प्रतिक्रिया दिनुहोस