‘चु याम्बु ह्याङ्लाइ हिन्ना ।’

ओन्मा दाङ्बो हेन्से पुइसि ब्राबा 
ङाला म्हेमेला बोक्टो ढाकार 
कोर्बान कोर्बान दोखाजि तिनि 
एनिला ख्रङ्गारि ङा 
एसेन थासि ब्याङ्बा 
ङाल आखेला थोबो थोसि ।
बिमुबा ङाला आखेसे– 
‘चु याम्बु ह्याङ्लाइ हिन्ना ।’

चु याम्बुला पाङग्याल स्होबारि 
ङाला आखेला टु कादे निताला ?
एला ग्लेखाङला स्हिङ्खाम स्हेङ्बारि  
कादे कादे का ब्योङ्जि ताला ?
दातेइ तिनिदोना कु ठोक्सि 
चु याम्बु  ह्याङ्लाइ हिन्ना
बिसि बिखाम्बा आरे ।

ओइ ङाला च्याङबा ! खाउ तिनि 
तोजा फिला सिङगुन गाङरि  टिसि
साङ्गे कोन्ज्योसोमदा थोबोरि थान्सि ।

पाङ्सि पिन्गे ग्रेनग्रेन काइरि–
थेनागि स्योङ गान्दिदा
नोबा नोबा ज्योमो गाङ्कादेदा
सालिङ्ला म्हिकादेदा 
चु ग्लेखाङ ह्याङ्लाइ हिन्ना बिसि 
पाङ्सि पिन्गे चुनिकादेदा 
ह्यङ्ला आखेला काइरान 
पाङ्सि पिन्गे ह्रेन्जेन दोर्जेला नाम्दार 
थेनालाइ पेङ्दोर्जेला डान्फुलाई काइरान ।

फ्यासि थान्बा ह्याङ्ला काइरान 
दोसिन ब्रिगे ह्याङ्से 
गोसि ताम्सलिङ्ला ह्वाइ 
ख्याप्के सिंहदरबारला 
क्युरुरु लुङ्दार
दोसिन तिरेम पाङगे– 
‘चु याम्बु ह्याङ्लाइ हिन्ना !’