आमा !
ङा मुग्लान ह्युुलरि आहाबा हिन्साम
देप्पेन एदा म्राङ्बारि म्याङ्सेदा
तिनि एलान ङोन्छाङ चिम्याङ्सेदा
एसे ङादा लाइनु बिसि ङ्योइबा
चु न्हाबेङरि दात्तेन ह्राङ छोर्बान मुला
च्यागोले आमा
स्ह्यो दिन गे लासि
५५ डिग्रिला छेप्पा दिनि ख्योल्बारि
सिम्बा एसिरि म्हेर्बा एला कोला
हाइमाइ आछोर्ना लासि
म्हेर्बाला म्हेर्बान ताजि तिनि ।
आमा !
ङा ल्हाना म्हाङ थोसि हामुबा
चु ङोआसेबा ह्युलरि
थे बर्खारि नाम ब्रेबा सोला छानो
नाम्दुङ दुगुला थे लाबालुङ्से लिक्बा
दिमला ङार पोआहाम्नि
एला लिरि ताङबा बाआहाम्नि
ज्याबा चाला
ज्याबान क्वान्ना बिबा हिन्ना ङाइ
तासाइ ङा हाबा छे सुत्ताइ फाआहाम्नि
ङादा माफ लाउ आमा ।
आमा !
ङा बाकसरि प्याक तासि हाबा कुनु
ङादा च्यासि थाक्रागो
एला मिख्लि फ्याबारि
ङाला चु या दारेम हाइमाइ आरेन
थाक्रागो आमा बिसि पाङ्बारि
चु सुङ हाइमाइ आठ्वाङ
एला लि ताङबा च्याबा सेम मुबा
तसाइ एदा स्हुरिन ख्लासि निजि तिनि
चु प्राङ्बोला म्हाङ बाकसरि प्याक तासि दोजि
ह्याङ प्राङ्बोला म्हाङ खाइमाइ आथुम्नि ।
चन्द्रपुर– १, रौतहट
तपाईको प्रतिक्रिया दिनुहोस