बोन्बो ङोसेबा
स्होर्दोइ थोइसि खाबा चु ङाला चिवारि
तिनि ल्हानान बाध्यताला दोइकादे
पुइजिबा मुला ङाइ ।
न्हा सारि क्याला
न्हा मुरि टाम्ला
ज्योमोगाङ्ला कुरि
जाम्बुलिङरि छ्याबा म्हि माग्पाल गुङरि
बर्जकाडि चुङ्बा छारबोन कादेसे
खाइमा टोक्मा, खाइमा अनाउ
खाइमा टुम्बक
खाइमा ग्लेठिमला दाज्र्यु पुइमा पुइमा
ह्राङ्लान ग्योइ म्हाजिमा
ह्राङ्लान ज्योइ म्हाजिम
ह्राङ्लान ह्रुइ म्हाजिम ।
फ्लिकदोसि च्याम
साइलुङ गाङ्कादेरि दुर्सा आम्हाजिम
हिन्ना थेनोन हिन्ना ङाला दोङरापला गजुर
ताम्बा, बोन्बो, लामा आम्हाजिम
ङा म्हासाइ ङाला आमा अम्हाजिम ।
म्हिसे वा जुथान्मुला चाबा ग्लारि
फुप जुथान्मुला ब्राबा ग्यामरि
हिन्ना ह्राङ्से ह्राङ्दान
आगोना दातेइ
व्हाङ ख्वाजिमुला ह्राङ्लान लिउरि (भबिष्यरि) ।
तिस्या, तेमे, पोलो फुइबा साकादे ख्लासि
बसाइ ब्राजिमुला मरुभुमिरि
ह्राङ्लान दोङराप तामाङ ग्योइ म्लेसि
स्यासि चिमुला हिन्दी, इंलिस, ज्यार्दी ग्योइरि ।
ह्राङ केबा ह्युल्सा
स्हेङ्तोबा दायित्व ब्याङ्सि
ह्याङ थोमचिमुला बाह्रमासे बैंसारि
ल्हुइ खेरो निचिमुला स्याडा ब्रेल्बारि
ना थान्बा ब्याङ्बा
ताम थोसि कजिङ्गाल
लजिमुला म्रिङ ह्रेम्बोरि
दुस्मन म्राङ्चिमुला
ह्राङ्लान वंशरि
ताङ्सि चिमुला
ह्राङ्लान बदनामरि ।
सिन्धुली
तपाईको प्रतिक्रिया दिनुहोस