बाङ्सिजेन आताबाजिम
छोसिजेन आताबाजिम
डोसिजेन आताबाजिम होइ ।
ओइ आप्थेबा !
ह्राङ्ला रिमठिम
ह्राङ्ला काइरान म्लेबा स्युकसेम
लोख्प्खाङ बिबान तिगाइ आहिन्बाजिम
ज्ञाणगुणना तामनुन तिगाइ आहिन्बाजिम
फोस्सोरिन,
ह्याङ्ला प्रात्तुगु,
बोर्डिङरि डोसिसिजेन
नार्दु ठाडो आलासाइ तासेदाजिम ।
व्हा आप्थेबा ! ओइ आप्थेबा !!
बोर्डिङरिम
लोप्पाम लोप्पाजिम
क्वान ओन्बारि
शान ओन्बारि
स्यान्दोला धर्मजे ज्याबा हिन्ना
मुतेबा ज्याबा
ज्याबाकादे छाङमान स्यान्दोला ।
पाङ्सि लोप्पाजिम
ह्याङ्लाम लोप्नुन आलोप्पाजिम
लोप्साइ आडो पेडो
आज्याबा बिसि लोप्ला ।
ओइ आप्थेबा !
ह्राङ्दा आखे, म्हेमेकादेसे
सुङ्थान्बा काइरानकादे हाइयोम
ह्राङ्निसेम ङ्यान्स्युजि तालामले ?
ह्राङ्निसेम जाजागार हिन्साइ
ङान्दा आलोप्साम
ङान्दा आलोप्पा हेन्देम
ङान्छे हानाङसे लोप्से ?
हानाङसे सेसे
तिगा डोतोबोम ?
तिगा कोतोबोम हाइ ङान्छे ?
ङानि प्रात्तुगुतामा थेबा
आखे, म्हेमेला ह्याङ्ला पुर्खाला
बाङ्बा न्हा बाङ्बा दिम
दिमला ख्राङ्गारि
पिङ्गाइ मु ह्राङ्बा पिङ्गाइ
ग्लिङ ह्राङ्बा तारतार्बा
ह्रि ह्राङ्बा पिङ्पिङ्बा
मे ह्राङ्बा वाला
वाप्वाप्पा
म्हार राङ्बा उरउर्बा
फेरफेर स्याजिबा लुङ्दार
रेनथान्बा साङ्गा, म्राप्साङ
हाइयोम आप्थेबा ?
ओइ आप्थेबा !
ओन्मा दाङ्बोरिम
पुर्खाकादेसेम आडोनि, ल्हाउ ख्लागे
आब्रिनि ब्रिबा आसेनि ल्हाउ थेनो ख्लागे
ओम ह्राङ्निसेम डोजि म्हाले
ह्राङ्निमि ब्रिबा ग्लारिन दोजि म्हाले व्हा आप्थेबा ?
ह्याङ्से ओदे ङ्हाज्याङ धोका चासाइनुन
ह्याङ्ला काइरान फ्यासाइनुन
थे बिमा लिच्छालाम हाइयोम आप्थेबा ?
ओइ आप्थेबा !
ह्याङ्ला काइरान ब्रिसिपिन्ला
ताम्सालिङ स्होसि पिन्लाबिसि
ज्योज्योआले छेपुङ्बा
ह्राङ्निसेन आहिनओम आप्थेबा ?
नानाआङा छेपुङ्बा
कलेला आमा, पोदेला मामखुयु
माच्चा दिम्ला नाङ्साल आङा
क्याम्साङ ब्लेला बिबाइस्या बिधुवा स्होसि
अर्जुन आप्च्याङ
धोन्दे पाराङ
डोल्मो आनि, आमकाइलिला खारे थामा
समर्थन लाबा आहिन ह्राङ्निसे ?
हाइयोम आप्थेबा ?
ओइ आप्थेबा !
हाइयोम ङान्दा ताम्सालिङ ?
हाइयोम ङान्ना ह्युल्सा !
हाइयोम ङान्ना काइरान ?
आप्थेबा ! ओ आप्थेबा... !!
२०७८/११/०४ गते
निजगढ बारा
दातेः नयाँबजार पोखरा ।
तपाईको प्रतिक्रिया दिनुहोस