ङाला चेगाइरि चेगाइला नुप्बाग्याम
चेगाइला मोती दुइबारि 
चेगाइदा बिबाते चेगाइ पिन्बा आरे व्हा
ह्राङ छोर्चिला, 
ङादामि एसे पुइगाबा 
हिक्कु न्हाङरि वाङ्सि 
एदा चेगाइ लाइह्राङ्बा
म्हान्जिला, 
एला मिला फुइबा
ल्हागतिचिला, 
एला सुङ्फिला फुइबा
ल्हागतिचिला, 
खाराङ्बा नोइ हिन्ना चु गोबारि आखाम्नि
ङादा तिल्दामुग्याम एला जेक्खे फुइबा
ल्हागतिचिला । 
एला चेगाइ थुसि
तिङरि तोक थान्ना 
एला सेमदा मिसे ह्याप्सि
थेग्याम थुबा ह्राङ्दा
सोना लासि, 
दोसि थेरि तोदे चेगाइ च्युर्सि
एला मिला म्रापग्याम
एला सेमदोना दोना लाबा ताला । 
ङ्याम्बा मुला थे
म्हेन्दो ह्राङ्बा
कोच्योरोक साम्सि निला
दुर्बल मुला थे
काँचला बोतलह्राङ्बा
प्याट्टा थिसि निला
सेमला दाग्बा ग्लारि 
तिला डोइ दुपुङ्गो
थेदा विवेकला ख्राङ्गारिक्यार 
कोर्बारि निआपुङ्गो । 
ङाला फुइबा खामा
ग्लाकग्लाक डान्बा थुङ््गो,
बस,  सेमदा चेगाइ... चेगाइ... चेगाइ...
जेक्खे चेगाइ जेक्खे कोबारि पिन्गो । 
मिरिक, दार्जीलिङ 
१४ फरवरी २०२५

(छिगला अर्थः चेगाइ–माया÷प्रेम, नुप्बा– गहिराइ, फुइबा– तिर्खा, नोइ– रोग, ह्याप्सि– निफनेर, च्युर्सि– पोतेर, दाग्बा– सुकिलो, दुपुङ्गो– तपाउनू, ग्लाकग्लाक– घटघटी, ।)

दोःबा : यकिना अगाध