गुलाफला म्हेन्दोम जाकि क्याथाङ्ला ताम हिन्ना
ङामला ताममि ह्याङ्से खाइमाइ आलानिम
तिनि ङामला ताम लाइ म्हान्जि थेबा
ङादा ह्राङ्लान ताम लाइ म्हान्जि !

ओस्सो च्यामा दान्नाइ लानिह्राङ म्राङ्बा
ङाला कोम्हेन्दोला ताम लाइ म्हान्जि थेबा !
चु चेगाइ सप्ताहरि गुलाफला म्हेन्दोला बोरि 
जोरगि कोम्हेन्दो पुइकाबाकेन मुला एदा
कृपया ! जतन लासि थान्गो
सेमला खाजिबाइ दारि प्रेक ग्रेन्सि 
खाराङ्लासि थानस्ह्युमुबा
माम थेन म्हेमेजुगुसे कोम्हेन्दोदा
दिम धुरिला मुल दारि 
आउदिन जतनसे ख्याप्सिमाम !

थेतासि थेबा चु चेगाइ दिङ्साङ्ला दुइसाङरि 
ङाइ ङातेन मुबा ङालान व्हाराला बगैंचारि रोबा
चुनोन कोम्हेन्दो पुइगाबाकेन मुला एदा
कृपया ! चुदा जतन लासि थान्गो 
खाराङ्लासि थानस्ह्युमुबा आख्खेजुगुसे
कोम्हेन्दोदा कुल कुल्यानीला मिन फुल्सि
दर सन्तानदा ङोसेना लाबारि बिसि !

एसे डान्बारिम खाम्लाले थेबा
ङाइ तोङ्जा रेम डान्सि
एदा उपहार तिगा पुइसे बिसि 
तिगा मुसिम थे साइआरेबा (अमुल्य) स्हे
थे उपहार एदा पिन्बारि खाम्गे !
छोन ह्याल्सि आनिबा म्हुइला लानि ह्राङ्बा
ङालान दिम ताला, कोठारि मुबा
चुनोेन चाङ्मा कोम्हेन्दो पुइकाबा मुला एदा
कृपया ! चुदा जतन लासि थान्गो 
खाराङ्लासि थान्बा मुबा पुर्खाजुगुसे
सजाब लासि सगुन पोङ स्ह्याल्गारजुगुरि 
तिथिरि ठिम छ्योना लासि 
रिमठिम ह्याङ्दा लोप्बारि बिसि !

थेबा ! छोनम्हेन्दो गुलाफला म्हेन्दोरिह्राङ
एसे चुरि छोन म्हाइबा ख्योल्बा गे थालाउ
ओम ज्याबाथाङ गुलाफला म्हेन्दोरि ह्राङ्बा
चुरि खाजिबाइ ज्याबाथाङ म्हाइबा ख्योल्बा नोन थालाउ !
कोम्हेन्दोलाम ह्राङ्लान छोन मुला
चुलाम ह्राङ्लान ह्रिक्पा मुला
खालाइसे आम्राङ्ना लासि सार्ला चु म्हेन्दो
खाराङ्लासि सार्ला तिङ ङ्हिरि चेगाइला गिक्खेन म्हेन्दो
थान्सि याफ्लारि गोरङ्हि स्यो
च्याना लासि च्यागो
खाइमा दिनि म्राङ्सेला मुला ओम खाइमा लानि म्राङ्सेला मुला !

डान्गो थेबा !
बगैंचारि खाजिबाइ गुलाफ सारआतो दारेम
चु चेगाइ दिङ्साङ नोेन खानोन आतो दारेम
खाजिबाइ रे, 
खाइमा व्हारा ब्लेला दोङरि 
रोसेला मुला लटरम्म कोम्हेन्दो 
थेदुइरि ह्याङ्ला चेगाइला दुइ खासेला मुला
थेनोन दुइ, खाराङ्लासि जाम्बुलिङ नाङ
म्हिजुगुसे गुलाफला बखान लाला
थेह्राङ्नोन लासि एसे
कोम्हेन्दोला बखान लाबा ङ्यान्बा सेम मुला
खाराङ्लासि जाम्बुलिङ नाङ गुलाफला म्हेन्दोला
व्हाइ कोला म्हिजुगुसे
थेह्राङ्नोन लासि एसे
कोम्हेन्दोला व्हाइ कोबा ङ्यान्बा सेम मुला थेबा !
१ फागुन २०८१

दोःबा : यकिना अगाध