ए निपिन्जि बिसाम...
डान्गोम चेमो !
ङा खाराङ ताला ताला ?
स्योङ आरेबा बगर
पिङ आरेबा पहाड
अक्सिजन आरेबा ल्हुइ
सार आरेबा मु
साङ्सोङ हार्बा केवा
दोङग्याम ताइबा बा ह्राङ्बान
दारे ङाला तिलाइ अर्थ ताला ओम ?

ए निपिन्जि बिसाम...
डान्गोम चेमो !
ङा खाराङ्बा ताला ताला ? 
तार टाङ्बा गितार 
खरी ताइ फुन्टि
याखारगि मेकअप लाबारि म्लेबा
आजेबा जेबा (सुन्दरी)
लडाइरि टुबाक आथोबा सिपाही ह्राङ्बा
मुतेबा स्हे मुला आछ्योबा एला तासेला मुला ।

ए निपिन्जि बिसाम...
डान्गोम चेमो !
ङा खाराङ्बा ताला ताला ?
ज्योमोगाङ मुला ग्लिङ आरे
समुद्र मुला क्युइ आरे
भमरा मुला डालीरि म्हेन्दो आरे
जवान मुला जवानी आरे
केवा मुला क्योङ आरे
तिङ मुला धड्कन आरे ।

ए निपिन्जि बिसाम...
डान्गोम चेमो !
ङा खाराङ्बा ताला ताला ?
फुइबा मुला वात्तिरि क्युइ आरे
रे मुला म्हुन आरे
भावना मुला ल्हुबा ग्ला आरे
बिले ए आरे चुरि...
ङा खाराङ्लासि एला ताबारि खाम्ला ?
ए निपिन्जि बिसाम...
डान्गोम चेमो !
(छिगला अर्थः चेमो– प्रिय, केवा– जीवन, क्योङ– पूर्ण, ।)

दोःबा : यकिना अगाध