जनयुद्ध ! जनयुद्ध !! जनयुद्ध !!
ङाइ डान्ना
ङा तिल्दा आकेनि ? 
ङाइ धिक्कार लाला
ङादा तिल्दा केवा आपिन्नि ?
ङाइ ङ्योइला विज्ञानदा
रक्ताम्य क्रान्तिला
स्योङ्तेन छ्याम
ङा तिल्दा अजम्मरी 
ताबारि आखाम्नि ?

ङादा नोन सेम मुबा 
थे कमरेडजुगुतेन
सामन्तीदा दुरआङ्बा
दलितदा थुर्बा पालेरि 
अपहेलित लाबा
बोक्सीला पालेरि 
ङाला आमादा मेरि होम्बा
थे समाजला अगुवाइला
कुरि ल्याक्पासे छेप्बा 
गोलीला छर्रासे क्रास्यारि
लेप्बा काला छिर्को प्योना लाबा । 
तासाइ संयोग ङा आकेनि
क्रान्तिला दोखाङरि आदोनि
पोजि शान्तिला सम्झौतारि 
ङाला आन्दोलन 
ङाला आपाला आन्दोलन
ङाला आमाला आन्दोलन
ङाला ह्युलला आन्दोलन
पोजि सेमला दशा 
संविधानला थोप्साङ दशारि !
पोजि उद्देश्य
वर्गशत्रुला गिक्खेन अभिलाषारि 
आन्दोलनला उद्देश्य आपोनि
आपोनि अन्याय अत्याचार 
पोबाम पोजि जेक्खे अन्यायला तोसो ।

दारे ङा केजि
ङाइ आन्दोलन म्राङ्जि
दलित क्राबा म्राङ्जि 
किसान, गेनाम वर्ग क्राबा म्राङ्जि 
म्राङ्जि ङाइ ह्राङ्ला आपा क्राबा 
आमा क्राबा
ज्योज्यो म्हाना लाबा
म्राङ्जि ह्राङ्लान आकु म्हाना लाबा 
दारे लेङ्बान तिला मुला ले ?
म्राङ्जि कमरेडला ह्रिक्पा पोबा
आपोनि जेक्खे ह्याङ्ला आशा समाजवाद
दारे ङा कुटिसि खाराङ लासि चिसे ?
ङा ह्राङ्नोन देन्बाला अनुभवरि सोचिबा मुला 
समाजदा ङ्योइबारि ख्लाजिन्जि
ह्राङ्दान ङ्योइला–
ङा तिल्दा केजि ? 
चु विवशतारि सोबारि ?
जनयुद्धला बो स्यान्दो जनयुद्ध ताबारि आखाम ? 
तिगा मुतेबा राज्य टुबाकला नालग्याम केबा आहिन ओम !
ङा चुनोन समाजला उत्पादन हिन्ना 
ङा चुनोन समाजला न्हाङ्ला स्हेला संघर्षग्याम केबा हिन्ना
हिन्ना दारेला जनयुद्धला नोन
तोसो शैली फेबा तासेला मुला
फेबा तासेला मुला क्रान्तिला किसिम
तासाइ उद्देश्य गिक्खेन तासेला मुला
टुबाकला बोरि कलमसे लासेला मुला युद्ध
बौद्धिकतारि तर्कसे लासेला मुला प्रतिवाद
हिन्बान फेबा तासेला मुला क्रान्तिला किसिम
हिन्ना, दारेला जनयुद्धला नेतृत्व ङाइ ह्राङ्सेन लासेला मुला । 

दोःबा : यकिना अगाध