जनयुद्ध
आदिवासी जनजातिसे जेक्खे लडआतानि
खाजिबाइ दलितसे जेक्खे लडआतानि
खाजिबाइ खस आर्य समुदायसे जेक्खे लडआतानि
जामेकोला व्हा ह्रेमकोलासे जेक्खे लडआतानि
स्यारसे जेक्खे लडआतानि 
लोसे जेक्खे लडआतानि 
मधेशसे जेक्खे लडआतानि ।

क्राफुइ न्हाबा आन्हाबा
जनै क्वान्बा आक्वान्बा
म्हेस्या चाबा आचाबा
कोन्ज्योसोम तेन्बा थेन आतेन्बा
विज्ञान गोबा थेन आगोबा 
मुबा चाबा थेन मुमा चाबा
जि थुङ्बा थेन आथुङ्बा
हिगि ङोसेबा थेन आसेबा
ताम पाङ्खाम्बा आखाम्बा
मोक्कोन मोक्कोनसे लडतिजि
खालाइ सेला कि तिला होइ बिबान
ल्हुइ सोना लाबाला लागि
वाङ्सिमाम लडतिजि
खालाइ ल्हुइ पिन्ना बिसि लडतिजि
खालाइ ह्राङ्ला बोला सुङ्नाङ पिन्सि लडतिजि
पण्डित नोन लडतिजि
लामा नोन लडतिजि
बोम्बो नोन लडतिजि
पादरी नोन लडतिजि
खालाइ डम्फु थोसि लडतिजि
खालाइ ओस्सोन गोल थोसि लडतिजि
लोप्खेनजुगु कलम थोसि लडतिजि
स्होन्बो डुप्ना डुप्नान दाप थोसि लडतिजि
म्हे मोइना मोइनान अनौ थोसि लडतिजि
मोक्कोनला का ङ्हेजि ।

खालाइला का फेबा आम्राङ्नि
चुह्राङ्लासि सामुहिक गोलबद्ध तासि लडतिजि
कौरव थेन पाण्डवला ह्राङ्बा
धर्मयुद्ध आहिन चु
चु ह्राङ्बाङ थेन उन्मुक्तिला लागि लडतिबा
महान जनयुद्ध हिन्ना ।

काइगिरि ङाइ पाङ्ला–
‘महान जनयुद्ध जिन्दावाद !’

दोःबा : यकिना अगाध