डम्फु ह्राप्सि ब्राला ङा
पेङ्दोर्जे म्हेमेसे स्हेङ्बाला 
ङाला डम्फुला काइरान कोसि ब्राला
ल्होछाररि डम्फु थेन टुङ्ना ह्राप्सि स्याला
ङाला दिमला ख्राङ्गारि छार दाज्र्यु क्याला
हिन्ना ङा तामाङ हिन्ना 
थे तासि ङाइ ङाला ह्युलठिम म्हाइबा हिन्ना ।

ङा ग्यागर ह्युल्ला तासाइनोन 
ङा तामाङ हिन्ना
ङा न्हाङरि तामाङला का छ्योङ्जिमुला
ङा यावेङ स्योङरि साइसि ब्याङ्बा
म्हेमेला सन्तान हिन्ना 
थे भिमफेदीला हान्डोरि गाडि पुइसि
ब्रानाब्राना का रुइसि सिबा म्हेमेला 
सन्तान हिन्ना 
तिगा ख्योल्बा मुबा ह्रिन्जेन दोर्जेला
थे रानीग्योइरि थोबो थासि हुर्बारि ?
दारेम ह्युलठिम थेन दोङरापला ङा
पानापाना ओरबाइगेन मुला
हिन्ना ङा तामाङ हिन्ना
थे तासि ङाइ ङाला दोङराप
म्हाइबागेन मुला ।

तामाङदा सिबा म्हेस्या चाबा भोटे बिसि
हेप्दिबा तिल्दा ?
तामाङकादेसे लाहुरे दोमा गुरुङ 
दोतोबा तिल्दा ?
दारेम कुटिसि आचि ङा
ङाला म्हेमेला काला 
काकार लासि बो किन्ना
ङा गर्व लासि पाङ्ला 
हिन्ना ङा तामाङ हिन्ना
ङाइ ङाला ताम्सालिङ म्हाइबा हिन्ना ।
रौतहट, दात्ते याम्बु 

छिगला अर्थः ख्योल्बा– गल्ती, बो– बदला,