गाङरि कुटिसि चिसि
आस्याङ्से क्याम्साङ च्याबा
युङ्बाला बो
स्ह्योरिन
खिम्जे आस्याङ्से पराल थान्बा माच दोबा मुला ।

दिनि आकेचिमान
ओम, वाला दुम्से ह्वाबा आक्राचिमान
स्होजिन्बा माचला बो
आस्याङ्से च्याबारि जेक्खे खामस्ह्युला 
थेलाफिरि तिलाइ सुङ्आखाम
तिल्दाबिसाम आस्याङ्दा थाहा मुला
पाङ्सि तिलाइ आता ।

छे तोबा मुला
चाचा तोबा मुला
छ्युकु तोबा मुला
म्ल्हा तोबा मुला
मान तोबा मुला
क्वान तोबा मुला
आहिन,
थे बिमा ल्हाना
लाबा तोबा मुला
थेतासि आस्याङ्से तिलाइ सुङ्आस्ह्यु
जेक्खे, क्युलक्युल च्यासिस्ह्युला ।

आस्याङ्से स्हिबा बो थेन डेङजुगु
ल्हेसिन चिला
चुह्राङ लासिन ल्हेचिमा 
आस्याङसे खाजिबाइ रे
ल्हेबा ग्लाग्याम
ल्हेचिबा ग्लारिक्यार च्यातोसेला मुला । 
आस्याङ
दारे डिल्बु, दोर्जे, ङ्हा, कङलिङ ह्राप्सिकेन
आखेजुगुसे खेप्पास्हुङ लाबा लाथान बिमा ल्हानान क्यारदोना
युङ्बा थेन साप्राला थेरेरे
छ्योर्तेन, म्हाने, थेन न्हानजुगु स्हेङ्तोमुला
ओम स्ह्योरिन
गुम्बाला थे लामा थेन आनीजुगुदा
छ्योकु लाबाकेन कोरो लातोसेला मुला
बोम्बोजुगुदा ङ्हा ह्राप्सिकेन 
हुङ्ग ग्ले ज्याल्बान खेपुङ्तोसेला मुला ।

हैट !
चोदे तासाम
स्युक्पाला थाङ्से
परालला माच ल्हेबा
खिम्जे खाराङ लासि कालकोल आता ओम ?
थे थुर, छ्योर्तेन, म्हाने थेन न्हान
खाराङ लासि वाइबा बाङ लाला
हिन्ना, 
आस्याङ
दारे युङ्बा थेन साप्राजुगु
पोप्बारि चुगे
लामा थेन आनीजुगुदा
सिमाना गुम्बा थेन लाथानरि 
परिचालन लाइ ।

आस्याङ
सिमाना आल्हेगाइ
सिमाना आच्याङ्गाइ
सिमाना सिमाना ह्राङ्बान थान्गे
मिसानाला ह्युलसे
म्हिला ह्युलला रेखारि 
जाजाकि सुताइ, सिम्बा आसुगे ।
(छिगला अर्थः बो– थुम्की/थुप्रो, खिम्जे– छिमेकी, क्युलक्युल– टुलुटुलु, थेरेरे– लहरै, कालकोल– रणभुल्ल, आल्हेगाइ– नबढोस् ।)

दोःबा : यकिना अगाध