ल्हारि वाइफ्युर ताना लासि
छार्बा पाडाला म्हेन्दो
ल्हुइ पोबारि पुवा बुसिनाम
ल्हुक ल्हुक ताबान लाबा
बेनान पिङ च्युलाकादे
थरि परिला चरा चुरुङ्गी
फुरफुर, चिरबिर
कुकु हेन्से कुकधुनधुन दोनाला जान्बा ताङ्बा
नाम, झरि, खासु सुपनिना म्हासि
मुला मुरि, साला सारि लासि
ज्योमोग्लिङ्से स्याम्सि
जाम्बुलिङनोन ह्याल ह्याल ताना 
आहा !
डेन्बान बाजि ल्होछार
ताङ्बान खाजि ल्होछार
दिमदिमरि ,नाम्सा, ह्युलसारि
तामाङ ह्युल्बाला सेम तिङरि
छ्याजि ल्होछार ।

जाजुबा आले आङा
ब्योन छामे हेन्से
म्हेमे माम नोन फुरफुर ताङ्बान मुला
छार छार गोइलो क्वान्छि
आमासे ख्राङ्बा सेल गेङ 
मिला ह्राङगारि छारछार दाज्र्यु, लुङ्दार थान्छि
दिङ्नोन पोबा दुइ 
आहा ! कादे छुबा ह्याङ्ला ल्होछार ।
ओसेम
जाम्बुलिङरि 
दिनिला दुइ गणा
म्हुनाला चार गुणा लासि
ह्रेङगाइ, ल्हेगाइ छेह्रेङगाइ, ज्याबाम्हान्बा ल्होछार ।

थेराङ्नोन
ओन्मा हेन्से 
ज्यार्दिला शानन थेन 
राज्य बिबा निरंकुशला अंकुशेसे
ह्रागनिना डुड्सि
ख्लोन लासि
तामाङ म्हेमेला
तामाङ ह्युल्बाला 
तिङन्हेत फ्लोक तात्छि चामाह्राङ
चुजिम ह्याङ्ला रिमठिम, संस्कार थेन संस्कृति
काङ्पालेसे प्लेकप्लेक ताना नाङ्सि थान्जिम
नुपनान लाजिम म्हाना लाजिम
ह्याङ्ला रिमठिम, ह्याङ्ला ल्होछार ।

दोइ पुइसि, गेनाम लासि
थेन्ना काङ न्हाइतोबा फ्यालातोबा
रेगिक ओस्नोनला गे लातोबा
लोप्खाङरि निबारि आम्याङ्बा
सरकारि जागिरलाम तिला ताम
जाजागिक ज्याबा गे नोन लाबारि आपिन्बा
मिला कसिङ्गार, धुलो ह्राङ्बान ताजिम
शाशकला लागिरि
ह्याङ तामाङ ।
ह्याङ्मि थेन्ना लागिरिम 
नुप्नान लादोबा, म्हानान लादोबा बितासि 
मिन नोना थान्जिम
बितासि मासिन्या । 
ह्युल्बा छोरुवाला एकताला 
काइपा काइमोला काइ टाङ्जि,
ब्रिखेनला ब्रिखुजेन आहिन यानोन क्युत्चि
अन्याय अत्याचार ल्होलो लासिन आतामा
लेङ स्होइ बितासि खारेन ग्रेत्चि 
ब्याङ्जि गान्दिरि ।

ओइ ! ज्योज्योआले, नानाआङा फेप्खाउ, ज्योन्खाउ
ओन्माला दोङराप ब्रिगे
अन्याय अत्याचार ब्रिगे
आह्रेमा चुदे ह्रेजि
आछोर्मा चुदे छोर्मा हेन्से
स्यागे या थेन या चुङ्सि ।
आगोबादा गोना लासि
आथैबादा थैना लासि
दाङगे ल्होछार
ह्याङ्ला ल्होछार ।

सिन्धुपाल्चोक, अन्दर्बुङ, ल्हेप्तो ।