सेमला अट्टाहसदा ढाडस पिन्बारि । 
चु कोलाहल थेन भिडभाडग्याम कोसौं थारेङ । 
ङाइ सेमरि मौनता थोसि
गुमनाम तेन्बा
पहाडला भन्ज्याङरि मुबा
खाजिबाइ सुनसान न्हानरि चिबा मुला । 
चुरि दोगामा ङादा छोर्चिबा मुला
चु न्हानसे ओन्मा दुइरि 
ल्हानान चेगाइ याङ्बा मुबा । 
न्हानरि तिबा युङ्बाजुगुला धुलो फ्याबान लामा 
ङाइ
गणितला सुत्र a+b ६२ ह्राङ्बान
p+s, b+d ... तिलाइ मिन खाराङ्बा मुबा ओस्बान स्याप्जि !
ओम स्याप्जि बाघचालला रेखा । 
तिलाइ दुइ कल्पना लाजि ओन्माला दुइला दुइदा
कल्पनारि ङ्ह्याबारि चुजि रेडियो नेपाल, 
बुद्धजुगुला वार्तालाप
जातुकुसे क्लाङ्बा लाबाम्हाबा !
ह्रोजुगुरि फुर्सदरि क्लाङ्बा बाघचाल । 
भरियासे ब्लाप्बा न्हामा खुइया लाबान ख्लाबा आनन्दला बु । 
बटुवासे ताङ्बा सेमरि किन्बा सिल्बा । 
नाम्साबाजुगु पोप तासि स्होबा विकासला योजनाजुगु । 
म्रिङ्कोलाजुगुसे कोबा विरह काइला ह्वाइजुगु
न्याउलीला विछोडला वियोगान्त काइजुगु । 
ढुकुरसे दोङरि स्होबा जाङजुगु !
चराचुरुङ्गी थेन जनावरजुगुला सुमधुर काइजुगु 
बेसीरि ब्योङ्बा स्योङला कलकल थेन सलल सुसेली !
चुनोन महसुसला लागि
दोगाबा फिरग्याप ह्युल्बाजुगु
प्रकृतिला लि छोन थेन यौवनरि मख्ख थेन दंग
ताबाकेन लाबा दुइला सन्तुष्टिला भाव । 
युङ्बाग्याम न्हानला ग्रेन दोङरि मि क्युर्माउ
म्राङ्जि खालाइसे ब्रिबा पानला बा राङ्बा बुट्टा, 
बुट्टारि कुँदाप लाबा सांकेतिक चेगाइला निशाना । 
थे मिनजुगुला कल्पनारि ब्लुम्मा
ङाइ स्याप्जि अनुप्बा चेगाइला रापजुगु । 
मौनता थोसि ब्राबा ङा
चुर्ला सुनसान आहिन
जेबा थेन सानदार माहोलसे ङाला मौनता क्लेपिन्जि
ओम बिजि, 
चेमो न्हान एसे स्यान्दोदा पिन्बा
चेगाइ, ह्वाइ, स्योम्बा, दुइ, अनुभव थेन आनन्द थेराङ्बा
ङाइए नोन याङ्जि । 
एफिरि हार्दिकता !
न्हान 
अद्भुत आनन्द !
चुरि याङ्ला
सातान खाइमादाम्मान । 
कल्पना नोन कादे ज्याबा ताला
तासाइ कल्पना लाबारि नोन सही ग्ला दाम्तोला । 
(छिगला अर्थः न्हान– चौतारी, लाबाम्हाबा– लुकामारी, बु– सुस्केरा, सिल्बा– सितल, काइ– भाका÷आवाज, क्युर्मा– डुलाउँदा, अनुप्बा– अनन्त, चेमो– प्रिय, स्योम्बा– स्पर्श, थेराङ्बान– हुबहु, खाइमादाम्मा– सर्वदा ।)

दोःबा : यकिना अगाध