ल्हानान प्लानप्लेन
ब्लोसि स्हुखाना लासिकेन डुप्बा
स्यान्दो अर्थ पिन्बा गिक्छा लि स्होमा
याखारगि डाबा डामुसिम थेदुइरि 
याखारगि विरासत तामुसिम थेदुइरि ।

डुप्ना डुप्नान ल्हानान स्हुखासि
मिख्लि थेन काला होनरि 
रोशी स्योङ खानाङरिक्यार ब्योङ्ला
थेरिक्यार नोन ब्योङ्सिकेन
ब्राबा थोबोजुगु
सुम्निमा थेन पारुहाङला बगैंचा ताबान
मुन्धुमी साला याखारगि गुरि 
खाराङ लासि लाजि
खाराङ लासि खेप्पास्हुङ लाबा ठिम जोर्सि थान्सि
खाराङ लासि पेङदोर्जेला ह्वाइ सोना लासि थान्जि
खाराङ लासि पहरारि छुम्सि थान्खाम्जि 
मन्त्र थेन हिगिजुगु
डान्बाकेन मुला
चु तापा (पुस) लाला लिच्छाला दुइ
प्लानप्लेन ब्लोसि स्हुखाना लासिकेन डुप्बा
याखारगि बुख्याचाला 
जयजयकार थेसि ।

ल्होलो लोङ्ना लाबा धम्कि थेन म्लिक्कारि
तिलाइ पुस्तादा
छुम्सि थान्बा मुला
देन्बा प्रमाण फ्यबा मुला
स्हुखाना लाबा दाप
डुप्सि थुइबा कित्ता
चेह्राङ डिक्बा म्राङ्ला 
तासाइ ओइ बुख्याचा ।

कोम्हेन्दो सार्बा सा
म्हाने थेन छ्योर्तेन छ्याम छ्याम
म्हेमे आखेजुगुला
ह्रुइसाल (अस्तु) ल्हुबा साप्रा
मुफिरि कर्याङकुरुङ फ्याङ्मा फार्बा
साप्राफिला अदृष्य अतृप्त पुर्खाला वीर आत्माजुगु 
दातेदोना एला जयजयकार ङ्यान्बारि खाम्बा आरे ।

चु लिम्बुला ह्युलग्याम
क्योङ ताम गोचिबा मुला
काङ्सोरेला आत्मजुगु 
कोचिबा म्राङ्बा मुला
युमा ग्लेस्याजुगु अदृष्य बोमो खाचिबा म्राङ्मुला
सुम्निमा थेन पारुहाङजुगु बोल्चिबा म्राङ्मुला ।

ओइ बुख्याचा देन्बान पाङ्गो ?
ह्रिस्योङ्गो, तेमाल थेन ताम्सालिङ
ह्युल्साजुगुग्याम
एला अत्याचार नाबारि आखाम्ना 
रोशी स्योङ्ला गुनोन गु
स्याररिक्यार ब्योङ्बा लाबा दातेइ लुसि
अरुणस्यार मुन्धुमी जाम्बुलिङरि
दातेइ दार्चिबा म्राङ्मुला
दारे पाङ्गो
ओइ बुख्याचा । 
चु प्लनेदोबा देन्बादा
डेबा खेबा नोइदा
डुप्बारि खाम्ला ओम ? 
ल्हानान प्लानप्लेन
स्हुखाना लासिकेन याखारगिन स्होबारि खाम्ला ओम ? 
(छिगला अर्थः गिक्छा लि– प्रारुप, होन– भेल, लाजि– लुक्यो, ब्लोबा– घोच्नु, डुप्बा– सिउनु, प्रलोभन/लोभ– म्लिक्का, छुम्बा– लुकाएर/गुमनाम, फार्बा– फरफराउने, खेबा– टाढिएको, नोइ– व्यथा)

दोःबा : यकिना अगाध