ओन्मा दाङ्मोरि स्हेङ थन्बा
स्यार, लो, न्हुप, ज्याङ बेनारिन 
ला थेन लुदा तेन्थान्बा
युङ्बारि मुबा हिगिरि 
ब्रिबा मुला ह्रिस्योङ्गो, अन्दर्बुङ ।
चु मिन चुङ्सि चाबा वा
ज्यार्दिसे ब्यान्छि बोर्बा वा
तिदा लाजि चुह्राङ लु पाङो
ताम्बा थेन गान्बासे,
ब्रिबा डोबा डोल्मो सोनामसे
दान्देन लादोजि बिचार सुर
तिल्दा चुह्राङ ब्रिबा रो
ह्रिस्योङ्गोदा लिसंखु
अन्दर्बुङदा अत्तरपुर ?
शासन लाबा शोसकसे
ज्याबा ज्याबा ग्ला कोर्जि रो
दाम्सि दाम्सि बोर्जि रो ।
ह्रि थेन स्योङला ख्युरुरु
होछेका मिन चिजि ह्रिस्योङ्गोला
योन्जन म्हेमेसे सा दाम्जि ग्ला दाम्जि
योन्जन फैबा छार्ना लाबारि
युगौयुग दान्छ्याबारि
गोलाङ स्योङरि चाम जुजि
पाटी गोरगिक स्हेङ्थान्जि
लहरि म्हाने थेरेरे
ज्यार्दिला तिङरि छेरेरे ।
ह्रिस्योङला ङामतेरि
स्योङ गिकाला साँध थान्छि
मोक्तान म्हेमेसे स्हेङ्थान्जिम
कादे ज्याबा मिन अन्दर्बुङ ।
अन्दर्बुङला म्हेमेसे
जाम्बुलिङ म्राङ्बा ग्ला दामचिम
पहरि बिबाकादेसे 
ह्याङ्ला मोक्तान म्हेमे थेन
छात्बा भोत्बा दुइरि
ब्रात्छि ओन्छ्यान ख्ला थानचिम । 
दिमला क्यारमार ख्युरुरु
ह्यु मुबा चिम चेनोन चे (फाँट) । 
दान्दोनान मुला होजा ग्ला
होजा ग्लाला मिन मुला ह्युगाङ ।
स्ह्योरि छोर्सि च्यामामि 
आमा दिनि फेप्खामा ह्यालाला
ज्योमोगाङ नेबा झलल
होदे ज्याबा ग्लाला मिन ह्याङ्ला
अन्दरबुङदा न्हुर्न लासि
अत्तरपुर बिमादोना
ओ ज्योज्यो, आले तिकदा थोम्बा ह्राङ ।
ओ नाना, आङा तिक्दा थोम्बा ह्राङ ।
ह्यु गाङला केरसे स्यार होना
स्हेङ्सि थान्जिम म्हाने गिक
म्हाने स्हेङ्बा धुइरिमि 
बोइरि चाजा किनिमा
चाजा दोखाबारि आखाम्मा
म्हाने स्हेङ्सि जिन्मा दोना
चाजा ङ्हाम्बा आरेमा
होजा म्हानेला मिन चिजिम
आम्लोङ म्हाने बिसिमाम ।
म्हाने फुप्सि निसाइनोन
ज्यार्दिसे तुप्सि निसाइनोन
युङ्बाला हिगि आसुप्लाइ ।
म्हेमेला जिन्लाप आनुप्लाइ ।
होतासि
नाम्साला ब्योन नेतासे बाङ लासि
स्हेङ्बान मुला आम्लोङ म्हाने
स्याम्बान मुला अन्दार्बुङ
अन्दर्बुङ्ला न्हुप होना ।
मोक्तान म्हेमे गिक दान्छ्याबा ।
होजान मोक्तान
म्हेमेला ङा छाया
होस्पा चोर्से गोसिम अखाया ।
ओन्मो दाङ्मो ह्यान्छेन चाङ्मा ग्ला 
फ्याङ्बा लामा दन्छ्यासि बाङ याङ्बा ग्ला 
युङ्बारि हिगि मुला रो
सेबा गोबासे सुङ्बा चिम
कोन्ज्योसोम दान्छ्याबा
ला लु डिक्सि दान्छ्याबा
होजान सा रो ल्हेप्तोबा
होजान ग्ला रो ल्हेप्तोबा
ह्याङ्ला ल्हेप्तोकादे ज्याबा ।
होतासि
ह्रिस्योङ्गोला छेनान थेन अन्दर्बुङला ल्हेप्तोबा ।
दातेइ चु ताम आगोबा
तामाङकादे तिक ताजि
चुनोन ह्यङ्दा बिक ताजि ।
ल्हेप्तो बिबारि पेत्बारो खालाइ
मिन थैसिन नेत्पारो खालाइ ।
छेनान ल्हेप्तो बिना बिनान
ह्राङ ह्राङ्ला दोङराप मुना मुनान
गा गु ज्यार्दिसे लाजि बास
बामान बिसि वाङ्जि खास ।
तिन्हाङ्गार बिना बिनान
कुमाइला घुमाइ झन झन
ल्हेप्तो, छेन्हान सुप्सिनाम
थान्जिम मिनमि साझाबन ।
साझाबन बिमा ताङ्बा
होराङ बिमा आपेत्पा
क्लि तामाङ कि म्हि तामाङ ?
खात्दामान बिसाइ आगोलै
धमासे दोसि तिक लासाइ ?
होराङ लासि
ल्हेप्तो थेन छेन्हान न थोबोरि
ओन्मा दाङ्मोला दुइरि
लामा मामसे छामरि दान्छ्याबा 
छ्योइ डोबा ग्ला चिम ओन्माला
ल्हानान ह्युल्बादा थाहा आरे
छ्योई डोबा गाङ बिमुला
ङानिमि क्लाङ्बारि निमुला
छ्योर्तेन म्हाने ह्राङ्बा
युङबाला ङ्हार मुला थेरि
मुला ह्याङ्ला म्हेमेला जिन्लाप
खाल्दाइ थाहा अरे ।
जिन्बा दुइरि
अन्दार्बुङला मोक्तान म्हेमे
र्हिस्योङ्गोला योन्जन
होजान म्हेमेला सन्तान ह्याङ
ब्रिसि डोसी गोतासि
तिक्जा लाजि होतासि ?
दोबाम दोजि म्हाले व्हा
जापान, अमेरिका, युरोपरि
बुद्दिला गाप ठोङ्तोजि
बिकास बिसि ताजि बिनाश
ह्याङ्ला ग्लादा सोना लादोजि
अत्तरपुर, लिसाङखु आबिना
बितोजि, ब्रितोजि
ह्रिस्योङ्गो, अन्दर्बुङ
जाम्बुलिङरि छार्ना ल्हेना लातोजि
ह्याङ्ला
ह्रिस्योङ्गो थेन अन्दर्बुङ ।
अन्दर्बुङ, ल्हेप्तो ।
(छिगला अर्थः ल्हेप्तो– पारिलो ठाउँ, छेन्हान– घाँस/स्याउला बोकेरा आउँदा जाँदा बिसाउने चौतरी, तुप्सि– हेपेर, आसुप्लाइ– नमेटिनु/मेटिएन, सुप्सिनाम– मेटाएर/मेटेर, आनुप्लाइ– हराएन/बिलाएन ।)