ला कु फोरि
सोम दिङ गोरि
पुइबा आमा । 
कुलु कुलु बिबान
लेप्पा क्युइसे ख्रुबान
दिनिला लेप्पा स्हेररि
छ्युकु फोर्सि
या काङ न्हाइबान
छार्ना लाबा थे
आमा !

‘आप्पा !
आमा !
माम !
आखे !’
बिसि ग्योइबारि लोप्पा
या न्हिसे थाइ थाइ लाबान
ङाला कोला 
उम्मा ! च्योक लासि
यँह्याँ ! यँह्या बिसि क्रामा
ल्हाना क्रामा पेते थोन्ना
न्हे ख्वादोजि बिसि
छार्ना लाबा थे
आमा !

दिमरि स्युइमिदा
कोला ख्लासि
फ्युक्पो मुल्मिला दिमरि
गे लाबारि निमा
क्यार्से ओर्से स्ह्यान्ना
कोला क्रामाइ 
आम्माइ ! ङालाइ कोला क्रादला व्हा !
दारेम योना निदोबा
मुल्मि म्हेमेसे आपुइ
ङा तिल लासे
सेम फोट फोट बोल्सि
गे लासि छार्ना लाबा थे
आमा !

तिनि न्हाङ्गार बिना बिना
बाम्सि ब्राबा ताजि
स्वा फ्युइगे दाम्जि
तासाइ कोङ्बा ङेबारि आखाम
आमाला न्हेसे आछ्योमा
ह्रोबा माकाइ मोठे
ङ्यात्पान न्याम ख्वाबान
म्रेन्ना लासि 
बेङगेरि नाइसि
हा ! हा ! लो होइ ! लो होइ !
बिसि म्हेर्ना छार्ना लाबा थे
आमा !

गोरि सिङला दोइ
खाइमाम छेला दोइ
छ्यामरि कोला
खारेदा ज्योन स्होसि
घलेक, सलरि च्योसि
ल्हातेन ब्याँसी
नाम दिनि आबिना
ह्राङ्दा क्रोसाइ कोलादा आक्रोगाइ
ह्राङ्दा बाम्साइ कोलादा आबाम्गाइ
क्युइ फुइमा ङ्हाच्छा
या मुठीरि आब्रेना लासि
ख्वान छार्ना लाबा थे
आमा !

ताते ताते लोप्मा
पाप्सि ठोक्मा, थामा
आमाले ! का खाजि !
दारेम खान बोर्साइ
खाल्दा पाङ्साइ
ङाला कोलादा
खात्लासि फाम्ना लासाइ
हे कोन्ज्योसोम
बिबान फोत फाते बोल्बान 
क्राबन क्रिङ्बा गुहार ह्रिबान
ह्रो पिन्बा खालाइ आस्याप्मा
हस्याङ फस्याङ ताबान
मि नाङ मिख्लि लाबान
पोररि म्हाबरेला बा छ्याक्सि
मान स्होसि फोर्बान छार्ना लाबा थे
आमा !

चु दुइ दोना दोखामा
आमादा 
खालाइसे ममी बिला
खालाइसे मामु बिला
खालाइसे माता बिला
तिगादाम्मा बिसाइ
आमासे पिन्बा गुण
आमाला न्हेला छे
खाइमाइ फाबरि आखाम
खाइमाइ एबारि आखाम
केबा दोन्बा कोन्ज्योसोम
केबा पिन्बा 
थे आमा !
थे आमा !