सडकरिन कोबा हिन्ना
सडकरिन स्याबा हिन्ना
सडकरिन म्हेर्बा हिन्ना
आफाप्मा फाप्तोमा हेन्से लोप्खेनकादे
आगेल्बा रेकादे गेल्ना लातोमा हेन्से सडकरि 
लोप्खेनकादे
जोर गि स्होन्बो आडेते
तोङ्जा गि ङ्हि आजिन्ते
आन्दोलन ताला 
सरकारसे म्हान्मुसिम 
आन्दोलन ख्यालख्यालला हिन्ना
चोथेबा लोप्खेनकादेसे प्लिङ्बा
सडकरि काङला फ्ला नाम्सा सहर खान्दामान ग्याम
सडकपेटीरि डुइचिमा 
डेबा सेम
चु सडकदा थाहा मुला
दिङ्छा हेन्सेला लोप्खेनकादेला स्हेर 
सरकार बेखबर मुला, थाहा आरे
सरकार म्हेर्ला
लाइनु बिजाकादेला म्हाङकादेतेन क्लाङ्ला 
घुक्र्याप लाला
बिले, थेसे तिगाइ आम्राङ स्याबा मेच फिरि 
म्राङ्ला जेक्खे
लोप्खेन गिक
दिला वर्ग
ब्लोसि ब्लोसि तिला बिला ल्हालोथरी
स्हुखाना लाला बाङ्से 
बाला लेबाफेबा निर्णय
तिनि थोबो आकुर्ना
कुला चौडा ब्लाक्ना लासि
सेम आरेना आरेनान
याखारगि ल्हामरि थोन्बो मुला लोप्खेनकादे
ल्हाम ह्रेङ्बा ताबारि खाम्ला
आज्याबा रिम सेङ्बारि दुइ ल्हागतिबारि खाम्ला
गाङजुगु दार्ला आदे 
ज्योमोगाङ ह्राङ नोसि
देन्बा ह्रिबा होङ्सि चिला थेनआताना...
ओइ ! सरकार
तिगा देन्बा ह्रिबा सम्बोधन लाला आदे ?
मइतीमण्डला, बानेश्वर च्योरप्लिङ्ना
गाप्बा च्यातोबा ? 
शान्तिपूर्ण आन्दोलनरि 
निषेधित थुम घोषणा
मुठभेड ङ्योइतोबा
च्याबा मि खाराङ्बा– एला
थे मुतेबा रे लिउला कर्णधारफिरि
पाइन ल्हागाब लाचिला
मुतेबा महंगी म्ह्याङ्सि– पालेआरेबा सोचिला
मुतेबा स्हेर छुम्सि– ङेचिला
तासाइ नोन लोप्खेनकादे लोप्खेन आता 
लोप्खेनकादे दिरि एनिकादे फिरि 
चुदि फिला क्लाङ 
क्लाङ्ला खाइमादोना ? 
खाइमा चुर्से खाइमा क्यार्से एला स्वार्थ पुइचिपुङ्ला
दारे ग्याप्से दोबा फुर्सद आरे लोप्खेनकादेदा
छाक गि ङ्हि कान आचाना तिगा ताला ? 
तिरे ङ्हिरे आडोना तिगा ताला ? 
तिरे ङ्हिरे आम्हेर्ना तिगा ताला ? 
खाम्ला, छेप्को बुट
ओइ सरकार !
लोप्खेनकादे खाबा मुला
कफन खिसि
एला सहर च्योरप्लिङ्बा मुला 
सरकार ! च्यागो एला मन्त्रालयग्याम
खतरनाक मि स्युसि
जालझेल लाउ
काइरि ठेगान आरेमाहेन्से
सम्झौता धोका तामाहेन्से
दारे तिगा विश्वास आलु बिबा ?
तिगा ललिपप ख्वासि
लोप्खेनदा दिमरि दोसि निउ बिबा न्याय ताला ? 
बिजाला क्लाङ आक्लाङ्गो सरकार 
सरकार सोचतिला
थान गि पेठिम
एला खाल्तीग्याम तेसि पिन्बा ह्राङ्बा 
म्राङ्ला
लोप्खनेकादे निम्छरो म्हिकादे
आडान्गो केवाला जिर्ण साइकल चलप लाचिबाह्राङ्बा
लोप्खेनकादे लुङ्सुर हिन्ना
फ्याङ्ना लाखाम्ला एला कुर्सी
खाइमा सम्बोधनला तयारी लासेला मुला
ल्हानान गाइजिन्सेला मुला
खालाइसे काबारि खाम्सेला आरे
दिनिला तेज होइस्हेर ह्राङ
लोप्खेनकादे छ्योङ्चिबा तासेला मुला
थेदुइरि एला कुर्सी गुर्जिन्बा तासेला मुला । 
सिन्धुली ।
(छिगला अर्थः लोप्खेन– शिक्षक, गेल्बा– गल्नु, स्हेर– पीडा, बिजा– बच्चा, पालेआरेबा– निर्दोष, क्लाङ– खेल, डोबा– पढ्नु/पढाउनु, च्योरप्लिङ्बा– छपक्क ढाक्नु, पेठिम– ऐन, केवा– जिन्दगी, लुङ्सुर– आँधी)

दोःबा : यकिना अगाध