आमाला ङोन्छाङ ...
खालाइसे ब्रिपिन्जि आमा साजाम्बुलिङ हिन्ना
आमादा चोदे नाखाम्बा गा कुपिन्ना आदेमुबा

बरु साजाम्बुलिङरि खाइमागि साङ्गुला खाला
सन्तानला लागि ह्राङ फोइदान चिबा तिगाइ आहिन

चोदे कठोर छिग आब्रिपिन्साइ तासेला
सन्तानला ताङ्बाला लागि खात्दामा स्हुनोन नाला ।

चोदे ल्हिबा दोइ पुइआपुङ्साइ तासेला
सन्तान सुखला लागि ह्राङ्ला ताङ्बा ब्यान्पुङ्बा

चुह्राङ्लासि ताङ्बारि नोन आपिन्ना खाला हिन्ना ?
आमा कोन्ज्योसोम हिन्ना

खाल्से पाङ्बा चोदेबा अमुर्त वाक्य ? 
टुसे बाम्बा रे– आमा श्रमिक हिन्ना
सेर्बासे ग्याङ्बा रे– आमा दुखित हिन्ना
खात्दामान स्हु खासाइ नोन नातोला आमासे
क्योकुकोठा, भान्छाकोठा, म्हेर्बाग्ला
बुव्हारि, वात्ति, नाङ, गेताङ
खाइमागि मयुङ दिम
आमाला कोर्बाकादे...
तिजला दुःखद् व्हाइजुगु– आमाला मनोरञ्जन
तिहारला तिरे– आमाला उल्लास
तिगा मुसिम ? 
ख्राङ्गारि ब्यो तिसि आमाजुगुसे– कौडा क्लाङ्जि
केवा बोदाइ ताना लाबा म्यारिज आहिन माल पारतिबा– म्यारिज क्लाङ्जि
केन, ह्रेम्बोला कल ब्रेक ताना लाबा– कलब्रेक क्लाङ्जि
बियर मुसाम बियर आरेसाम लोकल ज्याबा मुला बिबान–
ख्राङ्गारिन गिलास ठोक्सि
खाला हिन्ना थे
सन्तानला लागि छोन्बोन सितोला आमा बिसि
सोबारि नोन आपिन्बा ? 
चोदे ङ्यान्बा छिग ‘आमा’दा
चोदे कठोर स्होपिन्सि
खाल्से लाबा हिन्ना शब्दार्थफिरि कुठाराघात ? 
आमाला स्ह्याल च्याबारि बृद्धाश्रम निबाकेन लाबा ह्रो
सन्तानला ग्यार्जाछा ख्योल्बा आमासे माफ लाला
चु वाक्य दोसिदोसि पाङ्सि तिनि दोसि एसे
खाजिबा नेपाली कागजरि आमाला ल्याप्चे ल्हागाब लापुङ्बाकेन मुला ?
(छिगला अर्थः नाखाम्बा– सहनशीलता, गा– बर्को, स्हु– दुःख, गेताङ– मेलापात, ब्यो– मान्द्रो, ख्योल्बा– गल्ती)

दोःबा : यकिना अगाध