जाजा मुमा सिला बिबा पिर
ग्रेन तामा सेला बिबा पिर
आमा आपाला सेम जा जामेफिरि
जा जामेला सेम युङ्बा फिरि
बिबा उखान ल्हानान ग्लारि
डिक्बा म्राङ्मा नोन
ह्राङ्ला ल्हुइला बिमा
जा जामेला ख्याल लाउ आमा हिन्ना ।

जा जामेसे चाजि आचानि बिसि
लि च्यासिमाम पत्ता ल्हागाब लाबा
लि च्याबातेन तिगारि ताङ्बा, तिगारि आताङ्बा थाहा ताबा
खाल्दा तिगा सेम निला
तिगा सेम आनि
तिगा लाला, खानाङ निला ओम तिगा चाला 
खाल्ला सेम खाराङ्बा मुला बिसि
चौबिसै घन्टा सोचतिसि
आखाते दोना ब्रान्बा
म्हाइसि चिबा
बिबा दुइबिमा
ह्रेच्छाक गाइजि बिसाम
पिंजडारि थान्बा सुगाह्राङ
आउदिन बोल्बा
म्हाङ ह्रुप्बारि ब्राबा सन्तान
फिरग्याप ह्युलरि मुला बिसाम
तिर्याम लि आच्याना
ताम आलाना, काइ आङ्यान्ना
सेम आगोबा आमा हिन्ना ।

जा जामे खेप्पा खुयु दोमाहेन्से
मिला ङ्हाच्छा सातान जाजा म्राङ्बा
खानाङए निमा तोजि व्हा !
खालाइ आज्याबा का ल्हागाब लाजि व्हा बिसि
गाङ्साल सेम थोसि
आखादे दोना ग्यालाम ख्रुङ्सि च्याबा
आमा हिन्ना ।

खानाङए निमा मुगाइ व्हा खामा
तिगा तोजि बिसि 
हस्याङफस्याङ लासि
क्षमतासे खाम्बाते
पापपोप लासि
डिक्साम न्हे, तिङ्नोन
पुइपिन्गे ह्राङ् लासि
जा जामे दोखाङ दाङ्बाकेन लामा
थे जोडी मिसे म्राङ्तेदोना
दिम दिला ग्यालामला कुनिरि चिसि
फेसि निमा दिनि दोना दोप छोर्बा
खामा ख्रेन्बा, फुइबान म्हाबा बिसि
मिग्याम मिख्लिला फ्रुम पुइसि
के बाम्बा आमा हिन्ना ।

खाम्देदोना खालाइदा तिगाइ आतागाइ
तासाइ नोन ङातान तागाइ
थेदा स्हुखाबा, तोइबा बिमा
तिगा तातोबा ङादा तागाइ बिसि
कोन्ज्योसोमतेन फ्यास्हिङ लामा नोन
तिगाइ नाबा ङ्हाच्छान
बैज्ञानिकदा चुनाउती पिन्सि
आमाला ङ्हे स्हुखाबा संकेतग्याम
जा जामे नासेला पत्ता ल्हागाब लाबा
आमा हिन्ना ।

छ्याम मुमा ओतेबान पीर 
आरेमा झाननोन पीर
उमेर थाल्सिकेन निबाला छ्याम
ब्रेल्साङ लाजि झाननोन पीर
ब्रेल्साङ लिच्छा बिबाह्राङ आतामा
झान नोन पीर
छाया छुया ताजि
झान झान पीर
पीर नोन पीरला बो
ख्वाइबा आमा हिन्ना ।

मु ताइसाम बाम ताला
सा फ्रेसाम काङ फेङ्ला
खात्दामा परिस्थिति नोन नाखाम्ला
ङाला मिला ङ्हाच्छा
मिला नानी ह्राङ्बा तेजिलो तागाइ
नाम ताइमा ओत पिन्बा छानो
दिनि फेमा सिल्बा पिन्बा क्रिप
आमा हिन्ना ।

खानाङए बजार मुगाइ व्हा
खाजिबाइ मेलारि निमा मुगाइ
ह्राङ्ला ख्रेन्बा म्हाना लाबारि 
स्यान्दोसे पिन्बा दिगु
सेमसे ह्रिना ह्रिना नोन
फोइदान फो थान्सि आचाना
केरि युसि जा जामेला
सेम प्लिङ्ना लाबा आमा हिन्ना ।

खाल्दामासे तिल्दामान बिगाइ
स्हु, सुख मुनोन मुला
स्हु, सुखदा गु गिरि थान्सि
केवाला तिगाइ पर्वाह आलाना
ह्राङ मैननाङ्साल ह्राङ ह्याल पिन्बा
केवा थुम्साइ नोन
सिबा थेन सोबाला दोसाँधरि नोन
ह्राङ्ला बिमा 
कालाकोलाला ख्याल थान्बा
ओते जेक्खे आताना
सातानला लागि थारेङ तासि
स्वर्गला ग्यालाम दाम्सि
खासु क्याम्साङला
म्हेन्दोला वानरि 
फ्याङ्गुलिङ ह्राङ ब्या फ्रेङ्सि
स्याचिबा दुइरि 
जा जामेला स्हुरि 
ङोन्छुपरि ह्रुप ताबारि आखाम्साइ नोन
म्हाङरि तासाइ नोन
तिल्दा स्हु किन्ना सेम, 
म्हेला केवा चुह्राङ्बान हिन्ना
गाङरि जेक्खे दिनि आफे
होङरि नोन ल्हागतिला
स्हुरि आलोङ्गो
सुखरि आङ्योइगो
स्हुलिच्छा सुख खाला बिसि
जा जामेला स्हुरि 
सेम गोना लाबारि खाबा
आमा हिन्ना । 

दोःबा : यकिना अगाध