खाबा दिङ नोन
निबा दिङजुगुह्राङ नोन लासि थाल्सेला मुला 
रे ओतेन तासेला मुला
बार ओतेन तासेला मुला 
म्हुन थेन रे ओस्बान लासि पोचिसेला मुला...
लानि ग्रहण, दिनि ग्रहण ल्हागतिसेला मुला
ह्याङ फोख्रेन्जि, फोख्रेन्जि बिसि क्रिङ्चिसेला मुला
सरकार– ह्राङ्ला ख्रेन्बा म्हाना लाबाला लागि तल्लिन तासेला मुला 
फिरग्याप ह्युल फ्याङ्बाकेन लाबा नेपालीसे–
लिच्छाला रेम आमासा फ्यालाबा फोटो भाइरल तासेला मुला 
म्रिङ्कोलाकादेला ल्हुइदा–
पितृसत्ताला बजारसे थेनोन साइ कायम लासेला मुला 
छाउगोठ बोसेला आरे
म्हिला चेतनारि खाजिबाइ विकास तासेला आरे
सरकार न्हाङरि उथलपुथल ताचिसेला मुला
नागरिकग्याम कार्यकर्ता दोबा ताङ थेनतासेला आरे
लोप्खाङला फि झन ल्हेसेला मुला
रासनला साइ झन नोसेला मुला 
दुर्घटनाजुगु च्याङ्सेला आरे
च्याङ्ना म्हिसे–
साँढे दुइ करोड म्हि लुटतिबा प्रक्रिया जारी चिसेला मुला
तिलाइ सिनेमाला लेङ्बा सिरिज स्होसेला मुला
व्हाइखा, राप, ग्रेनराप, व्हाइ, गजलजुगु
दोसि नोन ब्रिखेनला भरोसारि सोसेला मुला
ब्रिखेनजुगु अचम्मला भ्रमरि ङेसेला मुला
प्रशासन ओस्बान सुस्त तासेला मुला
अदालत लुबाला दुरुस्त तासेला मुला
खानाङए सारला हाहाकार तासेला मुला
खानाङए होन थेन डुइ खासेला मुला
अमेरिकासे ह्याङ्दा च्याबा मि झन कठोर तासेला मुला
भारत ह्याङ्ला लागि ओस्बान दोसि चिसेला मुला
चिन पोलुवाला मे दोसि चोल्चिसेला मुला
याखारगि अद्भूत पोबा बिबा
छार बिबा पार्टी दिङ गि खेबा तासेला मुला
लम्पसारवाद, मगन्तवादm ठगवाद, लुटतन्त्र
भ्रष्टाचार, व्यभिचार, दुराचार, अत्याचारला खेती
झन ल्हेसेला मुला....
तिल्दाबिसाम चु–
ह्याङ्ला जेक्खे छार दिङ हिन्ना
ह्याङ्दा ह्याङ्ला 
ग्युइल, ग्योइ, संस्कार, रिमठिम
आतोबा छोर्बा ल्हानान दिङ ताजिन्जि....।

दोःबा : यकिना अगाध