गर्व लाला जामेकोला हिन्ना
कादे गोला चु दुनियाँसे
गोना लाला ङा जामेकोला हिन्ना बिसि
जामेकोला हिन्ना ङा जामेकोला ।

थाल्बा रेला थे दुइकादे
जेबा ताङ्बा डान्बाकादे
खासु दोसि खापपिन्ना
अनमोल मुला केवा जामेकोलाला ।

थे ख्राङ्गा ग्याम बिदा किन्सि
स्यान्दो ख्राङ्गारि दोगाजि
ह्राङ्लादा स्यान्दोम्हि
स्यान्दोम्हि ह्राङ्ला दोजि ।

खाराङ्बा चु रिम
जामेकोलादा जेक्खे ल्हागतिबा
तासाइ नोन जामेकोला ताङ्ला
थेतासि जामेकोला हिन्ना गर्व लाला ।

याखारगि जामेकोला गर्भरिन ब्याङ्ला
जाकि ग्रेन तासाम बलात्कृत ताला
विधवा दोसाम अलच्छिनी बिसि च्याला
खुयु दोसाम बोक्सी बिसि तोला ।

ङ्याम्बा तिङ ताला कोङ्बा
जेबा जाम्बुलिङला जेबा जामेकोला
फुप्बा महलरि सजप ताबा जामेकोला
तिनि तिल्दा आजेबा मुला ?

फुप्बा महलरि सजाप लाबा म्हाङ्जुगु
तिनि लथालिङ्ग मुला तिल्दा ? तिल्दा ?? 
फुप्बा महलरि सजप लाबा म्हाङ्जुगु
तिनि घाइते म्हाङ थोसि ब्राबा मुला ।

जामेकोला ग्याम सजप लाबा म्हाङ
तिनि लिखन्डि ताबा मुला 
जामेकोला शोषण ताबा लाचार तिल्दा ?
तिल्दा आगो जामेकोलादा ?

लाचार मुला जामेकोला
खाल्छे जाजा मुमा 
जुम्बि चुङ्सि ब्राबारि लोप्जि
तिनि थेलान सिकार ताला तिल्दा ?

आपाला या चुङ्सि छार्बा जामेकोला
तिनि थेनोन आपाला सिकार दोला तिल्दा ? 
ह्राङ्ला मयुङग्याम बलात्कृच
ताला तिल्दा ?

ह्राङ्ला सेमसे म्हान्बा थेन सेमदा हेल्सि 
ङ्हाच्छा खाबा मुला जामेकोला तासाइ नोन
तामुला चुरि जामेकोलान बेईज्जत
जामेकोलाला अपहेलना तिल्दा ?

सामाजिक, प्रशासनिक 
राजनैतिक, सांस्कृतिक थेन न्होर
थुमरि नोन जामेकोला ङ्हाच्छा मुला 
जाम्बुलिङ उन्बा जामेकोलादा चेगाइ तोबा मुला ।

म्हिला सेमतेन पोतोजि
जाम्बुलिङ उन्बा जामेकोलादा तिङ्से ङोसेतोजि
जाम्बुलिङ उन्बा जामेकोलादा सातान डेन लातोजि 
जाम्बुलिङ उन्बा जामेकोलादा चेगाइसे ङोसेतोजि । 
भारत ।
(छिगला अर्थ : हेल्बा– पन्छाउनु, ।)

दोःबा : यकिना अगाध