ताबा हिन्साम मि आम्राङ्बा
तोइसिकेन ओम क्यार्से जासे ह्योङ्सिकेन
काछ्युप जुम्बिजुगु व्हा पुइमुजुगुतेन
साम्सिकेन ब्रामा नोन स्हु आहासेला मुबा तिङ ।
ताबा हिन्साम आथेबा न्हाब्याङ
ङ्योइमा खालाइसे कि–
‘खानाङ हिन्ना ताप्लेजुङ निबा ग्यालाम ?’
कासालरि पाङ्बा
‘आचुङ ! तिगादाम्मा लासाइ आचुङ चुह्राङ्बा गुनी म्हे !’
चुह्राङ्बा कासाल दोबादोनाला बैरो
कि ओम ज्ञानेन्द्रीयजुगु ङ्हा नोन मन्द तासि
ताबा हिन्साइ नोन चेतना शुन्य
नासेला मुबा ओम आनन्द लासि ।
आगोबा हिन्साम पोबा व्हा क्रान्तिला ताम
आसेबा हिन्साम तार्किक देन्बा थेन तथ्यला ताम
थे ठिम, रिमठिम थेन अनुशासनला ताम
गिक्खेन आसेबा हिन्साम राज्य थेन ग्लेठिमला ताम
थोसिन ब्रासेला प्रेत्छान्सि शोषणला गाङ थोबोरि ।
तासाइ म्राङ्ना म्राङ्नान मि
थेना थेनान छ्याङ्ग न्हाब्याङ
ज्याबान मुमा ज्ञानेन्द्रीयजुगु
प्रष्ट म्राङ्ना म्राङ्नान अगुवाला थे मनपरीतन्त्र
सेनासेनान ‘कासी निबा’ बिसि कुतीरिक्यार वाङ्बा ताम
आना चु ल्हुइसे जाजागिनोन !
वंशीय सुख व्हा याङ्बा पदला ‘सुपेरियरिटी’ ला जालोसे
पद, न्होर व्हा थेह्राङ्बान म्लित्ता सुविधाला कम्बलसे
गाप्काइ ङाला मुतेबा ग्रेनग्रेन अगुवाजुगुला मि
विवेक गाप्काइ आउदिन स्वार्थसे
थेनोन बलेंसीरि छुन्मुन लासि याङ्बा सुखसे ।
संख्यारि ल्हानान तासि नोन लुचिबा बिमा
ङादामि गिक्खे बृहस्पति दोतोसाइ थेनोन ज्याबा
आङ्यान ल्हे अगुवाला थिबा लिरि
जड सिद्धान्तला छिगसे च्युर्बारि
जाजादा जेक्खे पाङ्चिबा अनुशासनला सुगा रटान लाबा
बिला सेमसे मे नाला बरु ख्योल्लुबा आना ।
मेचीनगर, झाप ।
(छिगला अर्थः ख्योल्लुबा– छलछाम, आना– सहन्न, तोइबा– ठेस लाग्नु÷ठोक्किनु, नाबा–खप्नु÷सहनु, म्लित्ता– लोभ, ।)
दोःबा : यकिना अगाध
तपाईको प्रतिक्रिया दिनुहोस