फ्युक्पोला दरबार सिंहशान
अठारा कोसला रानिवन
ह्याङ तामाङला कोलामि
साइलुङ, माबर, ग्यागरदान
प्राङ्बो तामाङ ह्युल्सारि
ढाक्रेम बासरि जा याङ्मा
चु पापि ज्यार्दिला शासनरि
खाइमाइ सुख आयाङ्मा
दातेइ ह्याङ्दा आख्लाजि
बामरिम बन्डा थोबोरि डा
तामाङ ह्युलदा च्यासिमाम
मिख्लिला ग्योइरिन क्याल्मुला ङा ।
स्हुमि याङ्बा दुइरि
चेगाइसे ख्लाबा ताम डान्म
प्राङ्बोला ग्यालाम काङ थान्थान
पुजुसे ब्लोबा ग्याम डान्म
जोरिम बैरिला ङोन्साङरि
मिख्लिम जोर्सि थोसाइ नोन
एसे ङादा ह्राङ्ला आबिनि खाइ
सिबाला टुङ्गारि दोसाइ नोन
डेबाम आङरे ख्याबाम कोट
ज्यार्दिला शासन पोथान्साम
सिमाइ दोसेला थार्बेलिङ
तामाङ ह्युल्सा स्होथान्साम ।
म्हेस्या पाङ्बाङ गाइ नाङ्नाङ
चाजाम मार्चा कान सिम्दा
खाइ तिला बिसि गोनालाइ
आगोबा स्होबा चेगाइदा
यारिम हाङ्सु थोबोरि डा
बासेरि गाङरि रा छासाइ
बैगुनि ह्राङ्ला आताबा जिम
तिङ नोन क्लेसि फ्लेक पिन्साइ
ल्हासाला जिपजिप काराला दोङ
टारिम थासाम बासिला
तामाङ दोङराप स्हेङ्थान्सि
केवाला ह्युलरि ङा सिला ।
भद्रकालि– ६, खोल्मागाङ, सिन्धुलि
(फूलकुमार बम्जन तामाङ डाजाङला चोहो हिन्ना ।)
(छिगला अर्थः स्हु– दुःख, चेगाइ– माया : डिक्खेन ।)
तपाईको प्रतिक्रिया दिनुहोस