याखारगि दाङ्बोला व्हाइला मे चुङ्सि
चुदोना दोगाबा मुला म्हाइसिकेन
खानाङग्याम थेनआताना प्योचिबा मुला शिलाजित तिङरि
दातेदोनारिम डुङजिन्तोमुबा व्हाइ
कुच्या दोतोमुबा या काङ
ताइ दोतोमुबा ल्हे
कुरतोबा मुबा थोबो
ओम मुतेबा मुतेबा तातोबा मुबा पोसिमाम
याखारगि ग्रेन शुन्यता ।

थोसि जाजाबा काङरि ज्याबाथाङ
म्हाइसिकेन ज्याबाथाङ पिन्बा बिरुवा
कोर्सिचिबा ङा सिङ्सोर
दातेदोना एला किटनाशक ख्युनसे 
शुन्य स्होआजिन्बा मस्तिष्क थोसि
चुङ्सि दाङ्बोला व्हाइला मे
चुदोना दोगाबा मुला
लाबासे खानाङग्याम थोसि बाबा मुला
स्युग केवाला ज्याबाथाङ ।

दोसि रेक्छाकरिन
साप्रा चासि साप्रान स्योर्बा
ङा, 
अमेजन बर्षाह्रिला आदिवासी तिङ थोसि
साजाम्बुलिङ ङ्याम्ना लाचिबा सालि हिन्ना
एला प्रविधिसे
ह्रि, ब्ले, गाङ ट्वाइसि
क्षतविक्षत मुला, साप्रा ह्राङ्बान साप्रा ङा
ओम डिक्बा ङ्हाच्छा एसे मरुभुमि दोना लाबा साप्रारि 
चुङ्सि दाङ्बोला व्हाइला मे
म्हाइसिकेन, चुदोना दोगाबा मुला
नारकापाङ्से खानाङग्याम थोसि बाबा मुला 
चोदेल्हाना पीयूष क्युइधारा ह्राङ्ला ङ्याम्बा ब्यापरि ।

याखारगि दाङ्बोला व्हाइला मे चुङ्सि
दोसि स्याउरि 
दोसि लोखोर्के
दोसि कलिआमा
दोसि बालाङबुलुङ
म्हाइसिकेन चु साजाम्बुलिङला आत्मा
ह्रुप्सि आहत आहत आश
ङा दोगाबा मुला एला ङोन्छाङ
आश्चर्य !
थेनआताना ङ्ह्याचिबा केवाला ह्रोल्ज्याङ
थे एला तिङग्याम माङ्ग्यार थोन्बाला चिम
ओइ म्हि !
मुतेबा शुन्य ताबा ङ्हाच्छा
ङाइ थेबाह्राङ तिल्दा आथे ?
थेनआताना ङ्ह्याचिबा मुला एला तिङरि 
एसे जिसिकेन निबा, 
एसे ग्रेसिकेन निबा
फ्यासिकेन निबा,
साजाम्बुलिङला आत्माला दाङ्बोला व्हाइ !
(छिगला अर्थः साजाम्बुलिङ– धर्ती, दाङ्बो– आदिम, मे– फुर्का÷पुच्छर, प्योबा– रसाउनु, ख्युन– विष÷विषादी, स्युग– उत्ताल, ज्याबाथाङ– बास्न, थेनआताना– निरन्तर, ह्रोल्ज्याङ– संगीत, माङग्यार थोन्बा– निसृत, ।)

दोःबा : यकिना अगाध