तोर नोबा साइलुङ गाङ थासि
मार याम्बु फाब्जि डम्फु
ताक धुइ धुइ... ङ्ह्यासि
ह्रि, गाङ, ह्युल्सा दिर्ना लाबा
आम्बुसिङ्ला घेरोरि 
ताङ्सारला डि छेङ्सि स्हेङ्बा डम्फु
याम्बुरि दोमा हेन्छे
ङोसेबा, ल्हेबाफेबा थेन 
अस्तित्वला व्हाइ गोजि कि आगोजि ?
कि डाजाङरिन च्योइसि चिजि ?

विभेद थेन ङोसेबाला काइदा
शासक चिबा दरबारला म्राप्सोङरि 
धुइ दिर्ना लाखाम्जि कि आखाम्जि ?
कि सिम्बा लाबासे ओसेब तासि चिजि ?

स्ह्योरि दिनिला स्हेर फेजि
स्योङ रेजि
गाङ रेजि
दोङ रेजि
च्योमोलुङ्मा रेजि
नाम्सा गाङ्सादा 
स्ह्यो गाङ्साल हेन्छेन् छोर्ना लाबा डम्फु
ह्युल्बारि सेना, गोना लोप्सि
आसाला गोङ्मा थोसि
ह्युल्बाला चेकाइ थोसि
साला, मुला चेकाइ सेमन्हाङरि थान्सि
काङ थानथान 
गाङखारो काठिदा साहरा थोसि
बोक्टो के थेन छ्यारबा गोजा खेत्सि
सिल्बा वातिरि 
मुठिनाङ सेम सिल्ना लाबा
क्युइ थुङ्सि
सेम न्हाङ्रि बोमोला खाराङ पुइसि
बोगाल थेन च्युइसे ङि (बत्तीस) वाण थेन धनुस पुइसि
बाइरिला दरबार निबा ग्यालम चुङ्सि
याम्बु केज्रि डम्फु ।

आखे मामसे पाङ ओर्सि
भोक्मो ख्राङ्बा आदिम सादा
बाइरिसे बोर्मा हेन्छे
व्हारि, याङ्ताम म्हाइबारि
थोबोरि पिङ्गाइ नामे फिर स्याना लासि
माना डु म्हार थेन ब्राला पोरे पुइसि
मार याम्बुला ल्हाम क्रेबा डम्फु
मासिन्या ह्युलठिमला
खोररि च्युप्चि कि
च्याल्दासे प्राक खिजि ?

ल्हाना दिङ ताजि
ङ्ह्याबा थाइबा आरे
ज्यार्दिला ठिमसे प्लेक्तेङ ताबा डम्फु
ङ्ह्याबा थाइतोबा
ङ्ह्याबा थाइबा आरे । 
सैलुङ–१, दोलखा, दातेः दक्षिण कोरिया ।