पाल्देन ज्योज्यो बोडोक्पा थेसि थोम निजि । शान्त थेन सरल ह्रिक्पाला थेदा तिला तामरि बोमो रेजिम ?

ङाइ थेदा दिङ ब्लिहेन्से ज्याना लासि ङोसेबा मुला । तासाइ ङाइ थेदा चोदे ल्हाना बोमो खाबा खाइमाइ म्राङ्बा आरेमुबा ।  

ओसो झ्याल ओर्सि बार्दलीलिक्यार च्याजि । पाल्देन ज्योज्यो दातेइ बोडोक्चिमुबा ।

‘ज्योज्यो ! आउदिन तानवरि म्राङ्मुले । तिला ताजि ?’ ङाइ ङ्योइजि ।

‘तिला तासे, चु भुसियादा स्या म्ल्हाकान ल्हागाब ताचिम । म्हि गेट ठ्वाङ्सि न्हाङरि वाङ्जिन्मा नोन चुला ङ्हुबा आठ्वाङ । चुला म्हेमे, चुला आपा चिसिक्का तिगाइ ताला आदेमुबा ग्वाप्पान ह्वामुबा । चुजा स्ह्यो स्ह्योरि कुरम्याङ्सि, रेदाङ्से स्या नाख्रु चासि, ह्राङ्लान चिटिक्क ताबा डोइखाबा दिम याङ्सि रङ्तिचिम आले ।’ पाल्देनसे थोप्लेफिरि मुतेबा बोमो ल्हुजि ।

‘आहिन, ताबाचा तिला हिन्ना ? ज्योज्योम चुदेबिमा बोमो खाबा म्हिमि आहिन !’ ङाइ ताम ट्वाइच्याजि ।

‘ख्रुसि साङ्बा ङाला छार स्पोट्र्स सुज कम्पाउण्ड ग्याम्सेन म्हाजि । चुदा म्रेन्ना ख्वासि थान्बा तिला गे ? दारे चुदा बागमतीला होनरि बोसि आब्याङ्ना आतानि ।’

थोप्लेदा सिक्रीला छ्याम खानाङ्ए बोर्बारि तयार लाचिबा दुइरि गेट ठ्वाङ्सि न्हाङरि वाङ्बा थेला आले छोगेलला काङरि थेनोन ख्रुसि साङ्बा स्होन्बो म्राङ्सि थे पेसि प्रेकसिजि ।

थेसे ङादा प्लिक च्याजि ओम ज्युम ङेबान चेगाइसे स्योम्बारि चुजि ।

(छिगला अर्थः बित्थाला– निराधार, पाले– आरोप, बोडोक्पा– भुतभुताएको, ह्रिक्पा– स्वभाव, ओर्सि– खोलेर, रङ्तिबा– मातेको ।)

दोःबा : यकिना अगाध