नेपाल तामाङ युवा घेदुङला संघीय चोहोरि घम्ब घिसिङ तामाङ (मिलन) निर्विरोध निर्वाचित ताबा मुला । ३० चैत २०८१ रि ताबा ङिसछा संघीय जोम्नासे घम्ब घिसिङ तामाङला चोहोदानरि २३ म्हे छार कार्यसमिति स्होबा हिन्ना ।

कार्यसमितिला ह्रोचोहोजुगुरि कमल मोक्तान, मनोज अमिर लामा, अविनाश वाईबा, जामेकोला ह्रोचोहोरि दुधकासी तामाङ निर्वाचित ताबा मुला ।

ग्रेनगाउराइरि सुमित्रा मुक्तान, गाउराइरि छेडुप मोक्तान, युवराज लामा, जामेकोला गाउराइ रोजिना तामाङ, न्होरचोहो मेनबहादुर लामा, छ्यान्होरचोहो विनेश तामाङ निर्वाचित ताबा मुला ।

कार्यसमितिला ह्रोम्हिजुगुरि अम्बर तामाङ, बिकास तामाङ, सूर्यमान तामाङ, ताराबहादुर तामाङ, जोखिम तामाङ,  राशिका तामाङ, पबित्र तामाङ, निशान तामाङ निर्वाचित ताबा मुला ।

जोम्नासे संगठन विभाग प्रमुख कान्छामान मोक्तान, प्रशिक्षण विभाग प्रमुख सरिता योन्जन तामाङदा स्होबा मुला बिसाम सुदुरपश्चिम प्रमुख विवश तामाङदा स्होबा मुला ।

जोम्ना नेपाल तामाङ घेदुङला वरिष्ठ ह्रोचोहो रामकृष्ण ब्लोन तामाङला ग्रेनडोन्बोरि ताबा मुबा । ग्रेनडोन्बो तामाङसे ब्योनदुइ बिबा समाज पोबारि म्हाइबा दिङ हिन्ना । ब्योनजुगुरि समाज थेन ह्युलला लागि तिलाइ लाइ बिबा ग्रेन सेम तामुला । ह्युल पोबा सेम थोबा ब्योनजुगु दाते ह्युलला ग्यालठिमसे लासि स्यानह्युल निबारि बाध्य मुला बिसि पाङ्जि ।

विशेष डोन्बो स्यानगाउराइ हर्क तामाङसे नेपाल सरकारसे १६ हेन्से ४० दिङला समुहदा ब्योन बिसि उल्लेख लाबासे लामा नेपाल तामाङ युवा घेदुङला नेतृत्वरि नोन चुनोन दिङला समुहदा दाम्तोला बिसि पाङ्जि ।

गाउराइ ङ्ही जयमान वाईबा थेन गोमनध्वज तामाङसे तामाङ गुङरि ग्योइला समस्या मुला बिसि कुटिसि चिला आदे बिसि पाङ्जि । खात्दामा थुमला तामाङ मुसाइ नोन ह्राङ्ला ग्योइ पाङ्बा थेन ब्रिबारि चुमाहेन्से जक्खे समस्या समाधान ताला बिसि पाङ्जि ।

जोम्ना युवा घेदुङला निवर्तमान चोहो बिलाम मुक्तानला चोहोदानरि ताबा मुबा ।

गेताङरि निवर्तमान चोहो बिलाम मुक्तान, विभागीय प्रमुख दिनेश लो, केन्द्रीय ह्रोम्हि सूर्यमान तामाङ, रोजबहादुर मोक्तान, ईन्द्रमाया तामाङसे छार निर्वाचित कार्यसमितिला पदाधिकारीकादेदा ज्याबाम्हान्बा पिन्बा मुबा ।