याम्बु । नेपाल तामाङ युवा, घेदुङला ङिसछा संघीय महाधिवेशन ३० चैत २०८१ रि ङ्योइसाङ लाबा ग्रा युवा घेदुङला चोहो बिलाम मुक्तानसे पिन्बा मुला ।

नेपाल तामाङ युवा घेदुङ, नेपाल तामाङ घेदुङला भातृ संगठन हिन्ना । युवा घेदुङ २०५४ दिङरि स्हेङ्बा गेन्दुन हिन्ना । नेपाल ह्युलला ल्होलो ग्लारि ठाम्सि चिबा तामाङ जातिला हक, याङ्ताम, ङोसेबा, ग्योइ, धर्म, हिगि (लिपी), संस्कार, रिमठिम, गोइलो थेन दोङरापदा छोन्बो थान्बारि लोकतन्त्र साइ तेन्बा राष्ट्रिय अखण्डताला संरक्षण लासि आत्मनिर्णयला याङ्ताम छ्याम जातीइ क्षेत्रीय स्वयत्त शासनदा लोकतान्त्रि गणतन्त्रात्मक संरचनारि क्यार ङ्हाच्छा वाङ्बारि ओसेम ग्यालठिम, न्होर, समुन्नततेन ह्युल तोरथिबारि तोबा योगदान पिन्बारि संगठानिक लिरि प्रयत्नशील चिबारि राष्ट्रिय स्तरला चु गेन्दुन ठ्वाङ्बा हिन्ना ।

युवा घेदुङला ङिछा राष्ट्रिय जोम्ना २०५९ दिङरि उर्लाबारी, मोरङरि ताबा मुबा । सोमछा राष्ट्रिय जोम्ना २०६३ दिङरि छन्त्याल भवनरि ताबा मुबा । ब्लिछा राष्ट्रिय जोम्ना २०६७ चैतरि ताबा मुबा । थे महाधिवेशन ग्याम न्होरचोहोला जिम्मेवारी याङ्बा बिलाम मुक्तान २०७१ फागुन ९–१० गते ताबा ङ्हाछा राष्ट्रिय अधिवेशन ग्याम ह्रोचोहोरि दोबा मुबा ।

डुछा राष्ट्रिय जोम्ना २०७६ दिङ पुष २८–२९ गते याम्बुला दरबारमार्गरि ताबा मुबा । चु जोम्ना ग्याम बिलाम मुक्तान चोहो दोबा हिन्ना । चु चैत ३० गते ङ्योइसाङ लाबा ङिसछा जोम्ना ग्याम छार पुस्तादा नेतृत्व पिन्सेला मुक्तानसे पाङ्जि ।

जोङ जोङ्ला जोङ समितिदा चैत २० गते न्हाङरि अधिवेशन लाबारि दुइ पिन्बा मुबा । प्रतिनिध दर्ता बिसाम चैत ३० गतेकुनु गेताङ ताबा ग्लारि लाम्याङ्सेला चोहो मुक्तानसे ग्रा पिन्जि ।