ज्योति विकास बैंकसे ह्युलला ग्रामीण थुमजुगुरि ल्हुइरक्षक चिकित्सा उपकरणजुगुला महत्वदा ध्यानरि थान्सि सुदुरपश्चिम प्रदेशला ल्होलो जोङ्ला अस्पताल थेन बर्थिंग सेन्टरजुगुरि क्योलोलो केबा लाइनुजुगुला ल्हुइला तापक्रमदा ज्याना लासि थान्बारि ओसेम हाइपोथर्मिया (अल्पताप) ला जोखिमग्याम सोना लाबारि तोबा बेबी वार्मर (डोइखाबा बिजा) मेसिनजुगु पिन्बा मुला ।

बैंकसे सुदुरपश्चिम प्रदेशला पहाडी थुमला आउदिन दुर्गम गोर ब्लि ग्लारि थे मिसिन थुइबा मुला । दुर्गम थुमरि सुरक्षित लाइनु न्हाबा सेवा तोबा तामदा च्यासि बैंकसे ह्राङ्ला शाखा आरेबा चु ग्लाजुगुरि नोन बेबी वार्मर पिन्बा हिन्ना ।

ज्योति विकास बैंकला पहलरि बैतडी जोङ्ला दोगडाकेदार गाउँपालिकारि मुबा श्रीकोट हेल्थ पोष्टरि बेबी वार्मर थुइबा मुला । छ्यामरि, दार्चुला जोङ्ला लेकम नगरपालिका वडा नं. २ शर्मौलीरि मुबा शर्मौली हेल्थपोष्ट थेन अपिहिमाल गाउँपालिका वडा नं. ५ सौगन्नारि मुबा सौगन्ना आधारभूत स्वास्थ्य केन्द्ररि नोन बेबी वार्मर थुइबा मुला । चुला छ्यामरि, बैंकसे बाजुरा जोङ्ला बुढीगंगा नगरपालिका वडा नं. २ ब्रह्मटोल हेल्थपोष्टरि नोन बेबी वार्मर थुइबा मुला । बुढीगंगा नागरपालिकालान गिक्छा बेबी वार्मरसे थे थुमला प्रसुती सेवारि सहजता काप्बा मुला । ल्होलो गेताङग्याम बैंकला मार्केटिङ, ब्रान्डिङ थेन डिपोजिट सेल्स विभाग प्रमुख कुशलजंग अधिकारीग्याम थे ल्हुइथाङ चौकीजुगुला पदाधिकारीला छ्याम सम्बन्धित थुमला ल्होलो पदाधिकारीजुगुला दाराप्बा गुङरि थे बेबी वार्मर औपचारिक लिरि यापिन्बा (हस्तान्तरण) हिन्ना । छ्यामरि थेनोन दुइसाङरि अस्पतालला डाक्टर, नर्स छ्यामरि सम्बन्धित कर्मचारीजुगुदा खेन्पो ग्याम्से बेबी वार्मर संचालन सम्बन्धी तालिम नोन पिन्बा मुबा ।

बैंकसे गेन्दुनगत सामाजिक उत्तरदायित्व प्रयोजनार्थ स्हेङ्बा ‘ह्याङ्ला विकास प्रबद्र्धन कोष’ ग्याम्से चु ४ वटा अस्पताल थेन बार्थिंग सेन्टरला छ्याम दातेदोना ह्युलनाङ ५९ वटा बेबी वार्मर मेसिनजुगु पिन्जिन्बा मुला । चु उपकरणजुगु ग्याम्से मुतेबा दिङ छ्योआछ्यो २०६५ बिमा ल्हाना नेपाली बिजाजुगुदा चु सुविधा पिन्सि अमुल्य केवा रक्षा लाबारि सफल ताबा मुला । विशेष लासि ग्रामीण थुमरि हाइपोथिर्मियाला दर नोबा मुला ओसेम चुकारण क्योलोलो न्हाबा लाइनुजुगुला केवा जोखिमरि परतिबा दृष्टान्तदा सेमरि किन्सि बैंकसे थे मेसिन पिन्सिकेन खाबा मुला । छ्यामरि, दातेदोनाला छ्योआछ्यो १०३२५ बिमा ल्हाना बिजाजुगु प्रत्यक्ष लिरि चु सेवा ग्याम्से लाभान्वित ताबा मुला । चुह्राङ्बा केवा रक्षा लाबा आउदिन ज्याबा थुमरि नेपालरि मुबा बैंक थेन वित्तीय गेन्दुनजुगु गुङरि ज्योति विकास बैंकसे ङ्हाच्छा वाङ्सि समाजरि याखारगि सकारात्मक पोबा ब्लु सुबा मुला ।