हेराङ (ललितपुर) । ग्योइकाइ क्रान्तिला गोर्कि सशक्त हतियार हिन्ना बिबा उद्घोषला छ्याम हेराङ्ला महालक्ष्मी नगरपालिका वडा नम्बर ६ ला देवननी नाम्सादिमरि ब्लिछा नेपाल ग्योइ, ग्योइकाइ तमुज्या गेताङ चैत्र २३ गते कामरेकुनु ताजि ।

गेताङरि नेमकिपाला गाउराइ सांसद प्रेम सुवालसे ह्युल्बाला ग्योइकाइ, ह्वाइ, ह्वाइखा, राप, गजल, हाइकु, ¥याप, भजन, व्हाइचेमारि सरकाररि निसि निर्वाचनरि फाबा ग्रान आन्सार गे आलाबा पार्टीला काइब्लोन, लोन्पो आन्हेम सांसदकादेला खण्डन लासि ब्रिबारि जरुरी मुला बिसि पाङ्जि ।

गाउराइ सुवालसे पाङ्जि, ‘नेपाली ह्युल्बाता सेनागोना लासि संगठित लाबा ग्युइसेर क्योङ्दान पिन्बारि जरुरी मुला । खोबोङ नगरपालिकासे ख्वप विश्वविद्यालय लोप्खाङकादे चलप लासि ७७ जोङ्ला ४३ तोङ्जा बिमा ल्हाना लोप्बोनकादेता उच्च ग्युइसेरला अवसर पिन्चिमुला ।’

थेसे चैत १५ गते तिनकुनेरि दोबा सर्वसाधारणदा म्होइजेन लाजि, ‘ग्लेतन्त्रसे सामन्त वर्गला प्रतिनिधित्व लाला । ह्युल्बाला दात्तेला असन्तुष्टि ग्लेतन्त्रसे सम्बोधन लासेला आरे । ओते जेक्खे आहिन, संघीय लोकतान्त्रिक गणतन्त्र मिनला पुँजीवादी गणतन्त्रग्याम्से दातेला समस्या सम्बोधन तासेला आरे । ह्युल्बाला चु असन्तुष्टि सम्बोधन लाबारि समाजवादी गणतन्त्र ह्सेङ्बारि जरुरी मुला ।’

म्रिङकोला सचेतकला चोहो सुजिता महर्जनला चोहोदानरि ताबा थे गेताङरि नेमकिपाला केन्द्रिय ह्रोम्हि ओसेम बागमती प्रदेशसभा ह्रोम्हि सुरेन्द्रराज गोसाइ थेन सिर्जनासे ग्योइकाइ तिल्दा तोला बिबा फिरि चर्चा लाबा मुबा ।

थसी देयला ज्येष्ठ नागरिक जितलाल महर्जनसे गेताङ ठोङ्बा मुबा ।

गेताङरि नेमकिपाला केन्द्रीय ह्रोम्हि ओसेम ललितपुर जोङ चोहो राजवीर डङ्गोलसे नोन सेमताम थान्बा मुबा ।

महेन्द्र ब्रम्हचार्यसे ग्योइकाइ गेताङ स्हेङ्बाफिरि चर्चा लाजि बिसाम मिकी महर्जनसे डेन लाबा मुबा । गेताङरि आशिष डंगोलसे डेन व्हाइ कोमुबा ।
काभ्रे ।