ललितपुर । कोन्ज्योसोम गाउँपालिका, सिलिङ्गेबेंसीला ज्ञानज्योती लोप्खाङ्दा याम्बु लायन्स क्लब वोन्डर वोमेनसे चैत ४ गते क्लाङ स्हे पिन्बा मुला । लोप्खाङ्ला क्लङ्छ्योङ थुमला विकास लाबा थेन बिजाबुमोला शारीरिक ओसेम मानसिक विकासरि ह्रो तागाइ बिसि चु गे लाबा हिन्ना ।

निबा म्हेनिङ १२ रि खाबा होनसे चु लोप्खाङ क्योङ लिरि क्षति ताबा मुबा । होन डुइसे लोप्खाङ्ला गोरब्लि भवन थेन दस्तावेजजुगु ब्योङ्माहेन्से लोप्खाङ दाते अस्थायी लिरि संचालनरि मुला । प्रधानाध्यापक कुमार भुलनसे होनसे लोप्खाङ्दा भग्नावशेष दोना लाबासे स्थानीय अभिभावक थेन सहयोगीजुगुला ह्रोरि लोप्खाङ चलाप लाचिबा ग्रा पिन्जि ।

चु लोप्खाङ्दा ह्रो ताना लाबारि नेपाली कांग्रेसला स्थानीय नेता ओसेम लोप्खाङ व्यवस्थापन समितिला चोहो चन्द्रबहादुर ग्लान तामाङसे पहल लाबा मुबा । थेसे स्थानीय सरकारसे चु थुमरि ध्यान आपिन्बा बिसि असन्तुष्ट व्यक्त लाजि ।

लोप्खाङ्ला बिजा विकास सहजकर्ता मिरा ग्लानसे ल्हुइथाङ (स्वास्थ्य), थुङ्बाक्युइ, शैक्षिक सामाग्रीला छ्याम तोबा नुररि राज्यसे ध्यान पिन्तोला बिसि पाङ्जि । थेसे बिजाबुमोला विकासला लागि क्लाङ्छ्योङ थेन ग्युइसेरला महत्वदा बाङ पिन्बान चुह्राङ्बा ह्रोसे लोप्खाङ्दा दोसि स्होबारि उर्जा पिन्ना बिसि पाङ्जि ।

होनसे लामा लोप्खाङ्ला गोर ब्लि भवन थेन दस्तावेजजुगु नष्ट ताबा प्रहरीसे जारी लाबा मुचुल्कारि उल्लेख मुला । चु घटनासे लोप्खाङ्ला संचालनरि ग्रेन असर पारतिबा मुला ।

लायन्स क्लबसे लाबा चु ह्रोसे लोप्खाङ्ला लोप्बोनजुगुसे क्लाङ्छ्योङ गतिविधिजुगुरि बोकिन्बारि याङ्बा थेन थेन्ना सिर्जनात्मकता थेन ल्हुइथाङरि सकारात्मक प्रभाव पारतिसेला अपेक्षा लाबा मुला ।