दोलखा । नेपाल तामाङ संघ दोलखाला चैत्र ४ गते ताबा गिक्छा जोङ जोम्नासे श्याम तामाङला चोहोदानरि छार कार्यसमिति स्होबा मुला । तामाङ संघ नेपाली कांग्रेस पार्टीला भातृ संगठन हिन्ना ।

छार कार्यसमितिला ह्रोचोहोजुगुरि सुक्लाल तामाङ, तारा पाख्रिन मुला बिसाम गाउराइरि प्रेम तामाङ, छ्या–गाउराइजुगुरि कृष्ण तामाङ थेन दावा घिसिङ, न्होरचोहोरि पशुपति तामाङ मुला ।

कार्यसमितिला ह्रोम्हिजुगुरि शंकर तामाङ, बिरबहादुर तामाङ, उर्मिला मोक्तान मुला बिसाम लेङ्बा ह्रोम्हिजुगु ल्होलो भुगोल थेन थुमग्याम कार्यसमितिसे मनोनित लासेला मुला ।

जोम्नासे केन्द्रीय प्रतिनिधिजुगुरि लक्ष्मी कुमारी तामाङ, कृपाश्रर तामाङ थेन कुमार तामाङ औतारीदा दाम्बा मुला ।

चुह्राङ्नोन लासि प्रदेश (क)ला संयोजक रामलाल तामाङ, प्रदेश (ख)ला संयोजक राजु तामाङ दाम्बा मुला ।

नेपाली कांग्रेस पार्टीला दोलखा जिल्ला सभापति बर्मा लामाला ग्रेनडोन्बोरि ताबा चु गेताङरि तामाङ संघला केन्द्रीय ह्रोम्हि ओसेम बागमती प्रदेश संयोजक बिलाम मुक्तानला प्रतिनिधित्वरि तामुबा । गेताङरि कांग्रेस पार्टीला जोङ गाउराइ, पार्टीला जिल्ला पदाधिकारी, क्षेत्रीय प्रदेश भातृ संगठनला नेताजुगुसे बोकिन्मुबा ।

ग्रेनडोन्बो बर्मा लामासे तामाङ संघ खाजिबाइ जातीय गेन्दुन आताना नेपाली कांग्रेस न्हाङरि मुबा तामाङजुगुदा गिक्खे लासि पार्टीदा कोङ्ना लाबारि स्होबा भातृ संगठन हिन्ना बिसि पाङ्जि । थेसे बिजि, ‘चु गेन्दुन ओस्सोन याङ्बा आहिन । ल्हानान रेम तामाङ समुदायला सन्त नेता भिमबहादुर तामाङ ह्राङ्बा ल्हानान तामाङ नेताजुगुला अगुवाइरि गिरिजाप्रसाद कोईरालादा दबाबा पिन्मा हेन्से ह्रोसे २०६३ दिङरि चु भातृ संगठन स्हेङ्बा हिन्ना । पार्टीदा समावेशीकरण स्होबारि चु गेन्दुनसे ग्रेन भुमिका क्लाङ्बा मुला ।’

केन्द्रीय प्रतिनिधि बिलाम मुक्तानसे नेपाली कांग्रेस क्योङ्बिमा ग्रेन समाजवादी राजनीतिक पार्टी हिन्ना बिसि पाङ्जि । थेसे चु पार्टीसे तामाङ समुदायदा ज्याना लासि ङोसेबासे तामाङला याङ्तामला लागि सातान ज्याबा गे लाला बिसि पाङ्जि ।

तामाङला जनसंख्याला डाटा उन्बान मुक्तानसे बिजि, ‘तामाङ नेपालला आदिवासी जनजाति समुदायरि सोमछा थेन नेपालला ङ्हाछा ग्रेन संख्यारि मुबा समुहला आदिवासी हिन्ना । नेपालला मुतेबा जोङरि तामाङ मुसाइ नोन ल्हाना बागमती प्रदेशरि चिबा लामुला । चु प्रदेशरि तामाङला जनसंख्या गिक्छा रेमरि मुला । चु प्रदेशरि १२ लाख १६ हजार ५ सय १७ तामाङ मुला । दोलखा जोङरि ३० हजार ४ सय ६८ तामाङला जनसंख्या मुला । जनसंख्याला हिसाम च्यामा ह्याङ राज्यला मुतेबा तहरि दोतोबा हिन्ना । तासाइ दोलखा जिल्लाला नमुना च्यागेः चुरि ११ सय ६८ जनसंख्या मुबा गुरुङसे चुनाव डाला ३० हजार बिमा ल्हाना जनसंख्या मुबा तामाङसे चुनाव ब्रेला । ल्हानान आज्याबा स्हुला ताम । चुह्राङ ताबाला कारण ह्याङ तामाङजुगुरि ग्लेठिमला जागरण आताना हिन्ना ।’

खाबा रेजुगुरि तामाङ संघरि मुतेबा तामाङजुगु पोप तासि तामाङ एकताला सन्देश पिन्खाम्तोला बिबान मुक्तानसे दातेला उपलब्धी बिबा प्रदेशरि तामाङसे मुख्य लोन्पो याङ्बा जेक्खे ताबा मुला बिसि पाङ्जि ।