ललितपुर । बागमती गाउँपालिकासे ह्राङ्ला वडा ङिसरिन धार्मिक अनुष्ठानरि तोबा स्हे बोलाबा मुला । चैत ४ गते सोमबार पालिकाला ख्राङ्गारि ङ्योइसाङ लाबा विशेष गेताङरि चु सामाग्रीजुगु वडा प्रतिनिधिुगुदा बोलाबा हिन्ना ।

गेताङला ग्रेनडोन्बो बागमती गाउँपालिकाला चोहो वीरबहादुर लोप्चनसे धर्मनिरपेक्ष राष्ट्र तासाइ नोन  मुतेबा धर्म, रिमठिम, परम्परादा डेन लासि तोबा स्हे ह्रोलाबा पालिकाला ठिम हिन्ना बिसि पाङ्जि । थेसे बिजि, ‘धर्म निरपेक्ष राष्ट्र तासाइ नोन ह्याङ्ला परम्परा थेन रिमिठिम, प्रिबाजुगुदा सोना लासि थान्बारि ओसेम धार्मिक आस्थादा डे लाबारि पालिकासे निरन्तर प्रयास लाचिबा मुला । खाबा रेजुगुरि नोन तोबा ह्रो थेन ह्रोगे (सहकार्य) लासेला प्रतिबद्धता लाला ।’

गेताङरि गाउँपालिकाला ह्रोचोहो भक्तबहादुर दर्लामी मगरसे नोन पालिकासे ल्होलो जाति, ग्योइ थेन धर्मला समुदायजुगुदा ह्रोगे लाबान खाबासे खाबा रेजुगुरि काप्सि गेताङजुगु बासेला ग्रा पिन्जि ।

गेताङरि वडा नं. ४ ला वडाचोहो रामकुमार लामासे तामाङ समुदायला परम्परागत धार्मिक अभ्यासला लागि चु स्हेजुगु उपयोगी तासेला मुला बिसि पाङ्जि । ‘ह्याङ्ला समुदायरि केबाहेन्से डोङ्बा संस्कारदोना चु स्हेजुगु आरेना आतामुला । चुसे ह्याङ्ला परम्परादा निरन्तर पिन्बारि ग्रेन राहत ताबा मुला ।’ थेसे पाङ्जि ।

गेताङरि ल्होलो वडाला चोहोजुगु ज्ञानबहादुर लो, नवराज खड्का, रामकुमार लामा, लामा गुरुजुगु, स्थानीय बुद्धिजीवि थेन समुदायला अगुवाजुगुसे बोकिन्बा मुबा ।

बोकिन्बाजुगुसे गाउँपालिकासे लाबा ह्रोला प्रशंसा लाबान चुह्राङ्बा गेताङजुगुदा निरन्तर पिन्बारि म्होइजेन लाजि । 
धार्मिक थेन रिमिठिम परम्परादा सोना लासि स्थानीय समुदायदा ह्रो ताना लाबा उद्देश्यसे लाबा चु सामाग्री बोलाबा गेताङदा थेरि दोबा स्थानीयबासीजुगुसे ज्याबा लिरि किन्बा मुला । पालिकासे खाबा रेजुगुरि स्यान्दो समुदायदा नोन तोबा आन्सारला सामाग्री ह्रो लासेला प्रतिबद्धता पिन्बा मुला ।