सिन्धुली । सिन्धुली कला घरसे चैत २८ हेन्से बैशाख ३ गतेदोना ह्राङ्ला गेदिम कमलामाई नगरपालिका वडा नं. ३ रि मुबा कला घरला ख्राङ्गारि राष्ट्रिय कला महोत्सव ङ्योइसाङ लाबा मुला । शुक्रबार स्योमि ह्रापह्रुप गेताङ थान्सि कला घरसे चु ग्रा पिन्बा हिन्ना ।

कला घर सिन्धुलीसे ‘नमुना कला संग्रहालय सिन्धुली कला घर कोर्बारि दोगे, नेपाली माउलिक कला रिमठिमरि ताङ्गे’ बिबा नाराला छ्याम चु गेताङ्ला ङ्योइसाङ लाबा हिन्ना ।

कला घरला चोहो सुमन थापासे चु गेताङसे कला घर दिम स्होबा अभियानदा ह्रो लाबान माउलिक कला रिमठिम प्रवद्र्धनला छ्याम कला घरला कलाला प्रचार तासेला मुला बिबा विश्वास किन्बा मुला । थेसे रैथाने क्लाङ, रैथाने रिमठिम थेन रैथाने कला कृषिला प्रवद्र्धन नोन तासेला आशा थान्बा मुला ।

ङ्हारे दोना संचालन तासेला चु महोत्सवरि च्युइ बिमा ल्हाना जात जातिला झाँकी उन्बा, नेपाली माउलिक परम्परागत म्राङ्बा दिमजुगुला नमुना स्होसि माउलिक चाबास्हेजुगु थान्बा थेन चाबाला लागि डिछ्या, च्याखेन ह्राङ्नोन बोकिन्बा ल्होलो माउलिक थेन प्रतियोगितात्मक सेमछुबा क्लाङ्जुगु संचालन लासेला मुला ।

गेताङरि हस्तकला, चित्रकला, मूर्तीकलाला छ्याम कलाजुगु उन्बा थेन छोङ्लाबा, लोप्बोनजुगुग्याम स्होबा विज्ञान थेन ल्होलो कलाजुगु उन्बा, लोप्खाङ स्तरीय स्याबा, कोबा थेन चित्रकला प्रतियोगिता, मार्शल आर्टला ल्होलो क्लाङ कला उन्बा थेन स्थानीय कृषि उत्पादन उन्बा थेन चुङ्बा लासेला मुला ।

गेताङरि कला घर स्हेङ्माहेन्से न्होर, भौतिक, नैतिक लिरि ह्रोलाबा म्हि, गेन्दुन, स्योमिदा डेन लासेला मुला ।