नेपाल प्रज्ञा प्रतिष्ठाला पहलरि नेपालरि पाङ्बा मोक्कोन ग्योइरि साझा ब्रिबा पद्धतिला लागि छार फन्ट बाबा मुला। 

प्रतिष्ठासे स्हेङ्बा अध्ययन कार्यदलला प्रतिवेदनला दानरि रमेश पौडेलसे ‘दुबो’ मिनला फन्टला डिजाइन लाबा हिन्ना। चु फन्ट डिजाइन लाबारि ला सोम ङाच्छा प्रतिष्ठानला नेपालला ग्योइकादेला साझा ब्रिबा पद्धतिला विकास अध्ययन कार्यदल थेन आवरण प्रकाशन गुङरि सम्झौता ताबा मुबा। सम्झौता आन्सार पौडेलसे मङ्गलवार थे फन्ट हस्तान्तरण लाबा हिन्ना। 

मङ्गलवार प्रतिष्ठानला सभाकक्षरि प्रस्तावित फन्टला नुररि विज्ञ ग्योइखेन्पे गुङरि फन्टला प्रस्तुतीकरण थेन काठुइ ताबा मुबा। ग्योइखेन्पो प्रा. डा. माधव पोखरेलसे प्रस्तावित ‘दूबो’ फन्टसे नेपालरि पाङ्बा ल्हाना ग्योइकादेला हिकि आरेबासे ब्रिबासे ब्रिबा पद्धतिरि म्रिङ्बा समस्या समाधान ताबा ताम थान्जि। प्रतिष्ठानला कुलपति भूपाल राईसे चु गे प्रतिष्ठानलान दायित्व ताबासे विज्ञ कार्यदलला ह्रोरि छार फन्टदा चोम्बा ताम थान्जि। प्रतिष्ठाला सदस्य सचिव डा. धनप्रसाद सुवेदीसे मेहनत लासि प्रतिवेदन तयार लाबा कार्यदल थेन दुबो फन्ट डिजाइन लाबा पौडेलदा थुचेछे फुल्जि। 

भाषा आयोगला चोहो डा. गोपाल ठाकुरसे प्रस्तावित फन्टसे नेपालरि पाङ्बा मोक्कोन ग्योइला ब्रिबारि गिक्खे खाबा ताम तान्जि।  कार्यदलला थुछापा अमृत योञ्जन-तामाङसे प्रस्तावित फन्टसे नेपालला ग्योइकादेला ब्रिबारि सहजता खाबा पाङ्जि। कार्यदलसा ह्रोमि प्रा. भीमनारायण रेग्मीसे प्रस्तावित फन्टला विशेषताला फिरि प्रस्तुतिछ्याम विशेषताला फिरि जानकारी पिन्जि। फन्ट चोम्बा आवरण प्रकाशनला प्रबन्ध निर्देशक रमेश पौडेलसे २२४ क्यारेक्टर मुबा ‘दुबो’ फन्ट देवनागरी थेन  युनिकोडबिमा फेबा लेआउट मुबा तासाइ प्रयोगरि बाबारि सजिलो मुबा ताम थान्जि। प्रा. राम लोहनी, डा. कृष्णप्रसाद चालिसे, डा.कर्णाखर खतिवडा, दिलेन्द्र सुब्बा, डा.सूर्यप्रसाद यादव, राजनलाल जोशीसे प्रस्तावित फन्टला नुररि ङ्योइबा छ्यामरि टिप्पणी थान्बा मुबा। 

अध्ययन कार्यदलरि थुछापारि अमृत योञ्जन तामाङ, ह्रोथुछापा डा. विष्णुकुमार सिंजाली ह्रोमिकादेरि प्रा. भीमनारायण रेग्मी, डा. तारामणि राई, अम्बरजङ लिम्बु, प्राज्ञ त्रैलोक्यमान बनेपाली थेन हंसवती कुर्मी मुला। कार्यदलसे तयार लाबा प्रतिवेदन २४६ पेजाला मुला।