ब्रिखेन नारदेन लामा तामाङसे ‘जीवन अनुभूति’ छ्योइ बाजि
छ्योइरि नारदेन (ङारदेन) वंशला देन्बा दोङराप
सुनसरी । ब्रिखेन छुइन्द्र नारदेन लामा तामाङसे ‘जीवन अनुभूति’ छ्योइ बजाररि बाबा मुला । छ्योइरि नारदेन (ङारदेन) वंशफिला देन्बा दोङराप ब्रिबा मुला बिसि छ्योइला डिक्खेन रविन्द्र तामाङ नारदेनसे पाङ्बा मुला ।
विमोचन गेताङ इटहरी उपमहानगरपालिका २० नं. वडाचोहो मणिराम श्रेष्ठला ग्रेनडोन्बोरि ताबा मुबा । ग्रेनडोन्बो श्रेष्ठसे छुइन्द्र नारदेन लामासे केवाला उत्तरार्धरि छ्योइ ब्रिसि ह्राङ्ला वंश, समाज थेन क्योङ ह्युलदा देन्बा दोङराप ङोसेना लाबा बिसि प्रशंसा लाबा मुबा ।
ग्योइसेरखेन्पो ओसेम समाजवादी दिपबहादुर तामाङ सिङ्गारला चोहोदानरि ताबा चु गेताङरि विशिष्ट डोन्बोजुगु नेपाल तामाङ घेदुङला केन्द्रीय ह्रोम्हि जानुकला पाख्रिन तामाङ, तथ्यांक शास्त्री प्राध्यापक विदुर नेपाल, नेपाल तामाङ बौद्ध लामा गुरु ओसेम जेष्ठ नागरिक थेन ब्रिखेन छुइन्द्र नारदेन लामा तामाङ, छ्योइला डिक्खेन अधिवक्ता स्यानह्युल कानुन ओसेम संवैधानिक कानुनखेन्पो, म्हि याङ्तामवादी, राजनीतिक छ्याम प्राध्यापक रबिन्द्र तामाङ, इटहरी वडा नं. १९ ला जामेकोला ह्रोम्हि इन्दिरा राई मुबा ।
गेताङला विशेष डोन्बोजुगुरि सिंगर तामाङ समाजला चोहो ओसेम भूपु शिक्षक मचिन्द्र सिंगर तामाङ, नेपाल तामाङ घेदुङ, इकाई वडा १९ ला चोहो निमा मोक्तान, घेदुङ सुनसरी समन्वय समिति ह्रोम्हि गणेश सिंगर तामाङ मुबा ।
गेताङला डोन्बोजुगुरि समृद्धि कृषक समुहला चोहो लोकबहादुर कार्की, मझौरा युवा क्लबला गाउराइ एशोधा राई, समाजसेवी नुत्रि हब फिट्नेस सेन्टर तथा जुम्बाला उत्तम केसी मुबा ।
गेताङ संचालन कलाकार ओसेम समाजसेवी सुरेन्द्र नारदेन लामासे लाबा मुबा बिसाम इन्जिनियर बिरेन्द्र लामासे डेन सेमताम थान्बा मुबा ।
गेताङरि छ्योइला डिक्खेन अधिवक्ता रबिन्द्र तामाङ नारदेनसे बिजि, ‘पर्शुराम तामाङसे ब्रिबा ओसेम नेपाल प्रज्ञा प्रतिष्ठानसे तेबाः ‘तामाङ जाति’ छ्योइरि नारदेन (ङारदेन) वंश तामाला फिरि ख्योल्बा ताम ब्रिसि ङोसेबा थुम्ना लाबा मुला । तामाङ जामेकोलाला फिरि नोन ख्योल्बा ताम ब्रिसि २०५१ दिङहेन्से अन्याय लाबा मुला । थे गम्भीर ख्योल्बादा सच्याप लाबारि ङान्छे रेमरेम म्होइजेन लासाइ नोन ह्रोसे आङ्यान्नि । चुला लागि ङानि दारे कानुनी ताङरि निसेला मुला ।’ थेसे छुइन्द्र नारदेन लामासे तेबाः चु छ्योइसे थे भ्रम थेन कपोलकल्पित सेमतेनदा क्लेबा ऐतिहासिक गे लासेला मुला बिसि पाङ्जि ।
थेसे ‘जीवन अनुभूति’ छ्योइरि ब्रिखेनसे बि.सं. १९१० ला मुलुकी ऐनग्याम्से तामाङ जातिदा लेबाफेबा लाबा थेन १८५० रि रणबहादुर शाहसे नुवाकोटला तोङ्जा गि तामाङ थाबा स्योला छ्याम खाराङ्लासि भिम शमसेरसे भोजपुरला दिलकुमारी तामाङदा ब्रेल्साङ लामाहेन्से जेक्खे तामाङ ब्रिबारि याङ्जि बिबा नुर ह्रुप्बा मुला बिसि पाङ्जि ।
विमोचन लाबा छ्योइला छुइन्द्र नारदेन लामा तामाङसे छ्योइ ब्रिबा जाँगर खाराङ्लासि ल्हागतिचि बिसि ह्राङ्ला सेमताम थान्बा मुबा ।
गेताङरि मझौरा टोल विकास गेन्दुनला चोहो दिपक सिलवालला छ्याम स्यान्दो म्हिजुगुसे नोन ह्राङ्ला सेमताम थान्बा मुबा ।
तपाईको प्रतिक्रिया दिनुहोस