ट्रम्प थेन भान्सले जेलेन्स्कीदा हेप्तिमाहेन्से
पत्यक्ष भिडियोला छ्याम
अेरिकातेन खनिज सम्झौताला लागि बिसि शुक्रबार ह्वाइट हाउसरि दोबा युक्रेनला राष्ट्रपति भोलोदिमिर जेलेन्स्की थेन अमेरिकी राष्ट्रपति डोनाल्ड ट्रम्प गुङ्ला ह्रुपताम (भेटवार्ता) प्राबा विवाद गुङरि थुम्बा मुला ।
वार्ताला ताङ्रि जेलेन्स्कीसे ट्रम्पदा बिजि, ‘ङान्ना ह्युल्सारि खाबा हत्यारातेन सम्झौता आलास्ह्युगो ले ।’
थेसे रुसला राष्ट्रपति भ्लादिमिर पुटिनदा उन्सि थेह्राङ बिबा मुबा । तासाइ ट्रम्प युद्धन्हाबाला लागि युक्रेनसे जाजाकि कुर्तोबा मान्यतारि मुबा ।
चुनोन कारण थेसे बिजि, ‘खाजिबाइ सम्झौताला लागि जाजाकि मेलमिलापपुर्ण दृष्टिकोण किन्तोला । म्हिजुगुसे म्हान्बाह्राङ ह्राङ्से ओते कुरआतो ।’
सम्भावित रुस–युक्रेन वार्ताबारि ट्रम्पसे काप्जि, ‘ङा गुङरि मुला । ङा युक्रेन थेन रुस ङ्हिलान पक्षरि मुला । ङादा चु (रुस–युक्रेन युद्ध) समाधान ताबा च्याबा सेम मुला ।’
ट्रम्पसे शान्ति सम्झौताला लागि अमेरिका तटस्थ चिबा महत्वपुर्ण ताबा तर्क लाजि ।
ट्रम्पसे पुटिनला सोझोन आलोचना आलाबा ह्राङ्ला अडानदा सोना लासि पाङ्जि, ‘ङाइ खालाइफिरि झुकाव थान्बा आरे । ङाइ अमेरिका थेन जाम्बुलिङला लागि तिगा ज्याबा मुला, थेला पक्षरि मुला ।’
विवाद थेदुइरि ताजि खाइमा ट्रम्पसे जलेन्स्कीदा अमेरिकाला ह्रोला लागि आभारी तातोला बिजि ।
चु ताङरि ट्रम्पसे बिजि, ‘ह्राङ बुमछा म्हिला केवातेन क्लाङ्बाकेन मुला । ह्राङ सोमछा जाम्बुलिङयुद्धला जोखिमरि मुला । ओम ह्राङ्से तिला लाबाकेन मुला, थे चु ह्युल (अमेरिका)ला लागि ग्रेन अपमान हिन्ना ।’
ट्रम्प थेन उपराष्ट्रपति जेडि भान्स ङ्हिसेन जेलेन्स्कीतेन प्राबा बहस लाजि ।
थेलिच्छा जेलेन्स्कीसे बिजि, ‘ग्रेन काइरि ताब थालास्हिगो ।’
ओम भान्ससे बिजि, ‘युद्ध थुम्ना लाबारि कुटनीति तोला । ह्राङ ओभल अफिसला अनादार लाबकेन मुला । चुसे तनाबदा झान ल्हेना लाजि ।’
भान्सला बचाउ लासिकेन ट्रम्ससे काप्जि, ‘ङान्छे ह्राङ्दा ३५० अर्ब डलर च्योच्यो हतियार थेन सैन्य उपकरण पिन्जि । ह्राङ्तेन ङान्ना हतियार आरेबा हिन्साम चु युद्ध हप्ता ङ्हिरिन नुप्सेला मुबा ।’
जेलेन्स्कीसे तुरुन्त क्यालो लिसे कासाल पिन्जि, ‘हिन्ना, हिन्ना चु युद्ध ङ्हिरे सोमरे नोन आटुसेला । ङाइ पुटिन ग्याम्सेनोन चुनोन ताम थेबा मुला ।’
ङ्हि नोन पक्ष गुङला चुह्राङ्बा बादविवाद म्राङ्सि थेरि मुबा स्योमिजुगु छक्क ताजि । अमेरिकाला लागि युक्रेनी राजदुत नोन ह्राङ्ला ङोन्छाङ तिगा ताचिमुला बिसि सोचतिसिकेन थोबो चुङ्सि चिबा मुबा ।
चु प्राबा बहसलिच्छा ट्रम्पसे बिजि, ‘चुह्राङ्लासि गे लाबारि गाह्रो ताला ।’
चुरि भान्ससे दोसि तिर्याम मध्यस्थता लाबारि म्हाइजि ।
थेसे पाङ्जि, ‘ह्याङ गुङरि असहमतिजुगु मुला, ह्राङ गलत मुस्ह्युला । ओम चुह्राङ्बा दुइरि अमेरिकी मिडियाला ङोन्छाङ झगडा लाबाला बो ह्याङ्से थे असहमतिफिरि ताम लातोला ।’
थेनि गुङ्ला विवादसे जाम्बुलिङनाङ तरंग बाबा मुला । चुफिरि ल्होलो ह्युलला नेतासे टिप्पणी लाचिबा मुला ।
तपाईको प्रतिक्रिया दिनुहोस