याम्बु । नेपाल स्योमि महासंघ युरोप शाखाला स्यानग्रेनगौराइ अशिम लोप्चन तामाङ ‘राष्ट्रिय सेवा डेन’ ग्याम डेन ताबा मुला ।
बिरिसु मिडिया प्रालिसे बुधबार याम्बुला चलचित्र विकास बोर्डरि ङ्योइसाङ लाबा ‘सोमछा स्टार म्युजिक एण्ड फिल्मस अवार्ड २०८१ थेन डेन गेताङ’रि थेदा डेन लाबा हिन्ना । फिरग्याप ह्युलरि चिसि नेपाली ङोसेबा उजागर लाबा गे लाबासे थेदा चु डेन पिन्बा हिन्ना ।
काभ्रे जिल्ला खानिखोला वडा नं ४ बाँसघारीरि आपा भिमबहादुर लोप्चन थेन आमा माईलीमाया लोप्चनला कुग्याम केबा थे निबा दिङ ब्लिहेन्से फिरग्याप ह्युलरि मुला । डेन लाबा गेन्दुनला आन्सार स्पेनरि चिसि नेपाल थेन नेपालीला सुख दुखरि ह्रोपिन्सि थेसे समाजसेवा लासिकेन खाबा मुला ।
ङ्हाच्छाला उपराष्ट्रपति परमानन्द झाला ग्रेनडोन्बारि ताबा गेताङरि विशिष्ट डोन्बो नेकपा समाजवादीला केन्द्रीय ह्रोम्हि संगीता तामाङ, खानिखोला गाउँपालिका ४ नं.ला वडाचोहो निशाल मोक्तान, छारिब्योन नेता मिलन थापा मुबा ।
गेताङरि त्रिशक्ती डान्स ग्रुपला कलाकार÷मोडल म्हेन्दो घिसिङ थेन सिर्जना घिसिङ स्याबा मुबा बिसाम कृष्ण राजभण्डारीसे व्हाइ कोबा मुबा ।
प्रालिला चोहो विवेक लोप्चनला चोहोदानरि ताबा चु गेताङला संचालन कर्म लामा गोलेसे लाबा मुबा । प्रालिला निर्देशक सुस्मिता स्याङ्तानला संयोजकरि ताबा गेताङरि डेन सेमताम प्रालिला प्रबन्ध निर्देशक नरेश भट्टराइसे थान्बा मुबा ।
(छिगला अर्थः स्योनाम– पत्रकारिता, स्योमि– पत्रकार, डेन– सम्मान, स्यानग्रेनगौराइ– उपमहासचिव, ह्रोम्हि– सदस्य, ।)
तपाईको प्रतिक्रिया दिनुहोस