नुवाकोट । ककनी गाउँपालिकाला ब्रह्मायणी आधारभुत लोप्खाङसे ४३ छा वार्षिक उत्सव दाङ्बा मुला । आइतबार स्हेङ्बा दोङरापदा डान्बान नुवाकोटला ककनी गाउँपालिका ७, चतुराले, बरबन्दीरि मुबा ब्रह्मायणी आधारभुत लोप्खाङसे ४३ छा वार्षिक उत्सव विज्ञान थेन गणित उन्सि ह्राङ्ला केवासाङ दाङ्बा हिन्ना ।

गेताङरि ककनी गाउँपालिका चोहो सुमन तामाङसे पालिकाला शैक्षिक गुणस्तर ल्हेना लाबारि सातान पहल तासेला बिबान ब्रह्मायणी लोप्खाङला विकासला लागि खाम्बा ह्रो लाला बिसि प्रतिबद्धता लाजि ।

चोहो तामाङसे बिजि, ‘ङा क्योङ गाउँपालिकाला अभिभावक ताबासे याखारगि जेक्खे लोप्खाङला लागि गे लाला बिसि पाङ्आखाम । वडारि मुबा मोक्कोन लोप्खाङजुगुदा च्यामा खाजिबा लोप्खाङदा तिगा स्हे तोबा मुला थेला लागि बजेट स्होसि परिपूर्ति लाबा गे ङाइ लामुला । चु ब्रह्मायणी लोप्खाङरि क्लाङ चेरि ब्लक युतोबा म्राङ्जि, ब्लक थान्बारि खाबा दिङ कार्यपालिकाग्याम बजेट पास लासेला मुला ।’

चोहो तामाङसे रानीपौवा चतुराले तासि बट्टार थुइबा सडक बो प्रदेश सरकारला आयोजना ताबासे लामा स्थानीय सरकारसे बजेट युआखाम्बा कानुनी प्रावधान गोना लाबान पाङ्जि चु सडकरि बजेट युजि बिसाम स्थानीय सरकारसे मुद्दा नातोला ।  

गेताङरि वडा नं. ७ ला वडाचोहो रामकृष्ण तामाङसे ह्राङ्ला वडारि मुबा लोप्खाङदा वडाग्याम युखाम्बा बजेट युसि लोप्खाङला विकासरि ह्रोलाबारि सातान तयार मुबा ताम थान्जि । थेसे चु वडारि ङ्हाउला बिमा दाते ग्युइसेर (शिक्षा)ला छ्याम स्यान्दो थुमला विकास नोन ज्याना लासि तामुला बिसि पाङ्जि ।  

गेताङरि पालिकाला शिक्षा अधिकृत पेमादोर्जे थोकरसे लोप्खाङरि राजनैतिक पूर्वाग्रह आथान्ना मुतेबा दल डिक्सि लोप्खाङला विकासरि गे लाबारि म्होइजेन लाजि ।

चतुराले (माझगाउँ)रि मुबा लोप्खाङसे वार्षिक उत्सवला दुइसाङरि लोप्खाङला लागि सा दान लाबा सादोप्ता कृष्णबहादुर तामाङ, क्युइदाता ठूलोकान्छा तामाङ, स्हेङ्खेन प्रधानाध्यापक रामशरण बोगटी, निवर्तमान प्रधानाध्यापक नवराज पाठकदा दोसल्ला न्हान्सि डेनस्योला छ्याम डेन लाबा मुबा । लोप्खाङसे निवर्तमान प्रधानाध्यापक नवराज पाठकदा चुनोन गेताङग्याम बिदाइ लाबा मुबा ।

‘समाजला मि लोप्खाङ’ बिबा ङ (मन्त्र) डान्सि वि.सं. २०३८ दिङरि थेदुइला चतुराले गाउँपञ्चायतला ह्रोम्हि स्वर्गीय ठुलोबहादुर तामाङसे चु लोप्खाङ स्हेङ्बा हिन्ना । लोप्खाङला लागि ङ्हाच्छाला वडाचोहो ओसेम समाजसेवी कृष्णबहादुर तामाङसे सा दान लाबा मुबा । थेदुइरि ङ्हाच्छाला ग्युइसेरलोन्पो (शिक्षामन्त्री) डा. प्रकाशचन्द्र लोहनीसे लोप्खाङ संचालन अनुमतिला लागि पहल लापिन्बा मुबा ।

गेताङरि बुम गि (एक लाख) च्योच्योला सिंगबहादुर गोले स्मृति छात्रबृद्धि कोष स्हेङ्बा मुला । हेटौडा उपमहानगरपालिका १३ पदमपोखरीरि चिबा सनमान गोलेसे ह्राङ्ला आपाला मिनरि चु कोष स्हेङ्बा हिन्ना ।

गेताङला दुइसाङरि लोप्खाङसे विज्ञान थेन गणित सीप उन्बाला लागि भोटिङ लासि उत्कृष्ट लोप्बोनदा पुरस्कृत लाबा प्रधानाध्यापक बिन्दामाया बज्युसे ग्रा पिन्जि । गेताङरि ककनी गाउँपालिका न्हाङरि मुबा आधारभुत स्तरीय हाजिरी जवाफ प्रतियोगितारि गिक्छा ताबा ककनी ७ ला महेन्द्र माध्यमिक लोप्खाङदा १० हजार, ङ्हिछा ताबा ककनी ४ ला भवानी माध्यमिक लाप्खाङदा ६ हजार, सोमछा ताबा ककनी ६ ला नवजीवन माध्यमिक लोप्खाङदा ३ हजार न्होरला छ्याम प्रमाणस्यो थेन मेडल पिन्बा मुबा ।

नुरगत लोप्खेन (शिक्षक) जुगुरि विष्णु बहादुर क्षेत्री, जयराम थपलिय, मोविन मियाँ, सुजन तामाङ– अंग्रेजी, स्थानीय पाठ्यक्रम सुशिला तामाङदा नोन पुरस्कृत लाबा मुबा । लोप्खाङसे लोप्बोन (विद्यार्थी) जुगुला क्योइतामला दानःरि लोप्खेनजुगुदा पुरस्कृत लाबा हिन्ना ।

खाल खाल्से याङ्जि पुरस्कार :

लोप्खाङसे ङ्योइसाङ लाबा आन्तरिक क्रियाकलापरि बोकिन्सि डाबा मुतेबा लोप्बोनजुगुदा पुरस्कृत लाबा मुबा । 
इसिडी गिक्छा कक्षाला बिस्कुट क्युइ छ्योङ्बारि गिक्छा कस्मीरा तामाङ, ङ्हिछा रविना मुडभरी, सोमछा सेलिस्टीना तामाङ पुरस्कृत ताबा मुला ।

ङ्छिा बिस्कुट क्युइ छ्योङ्बारि गिक्छा पवन तामाङ, ङ्हिछा गौरब तामाङ, सोमछा सक्षम तामाङ पुरस्कृत ताबा मुला ।

कक्षा १ रि ताबा बेलुन थिबा क्लाङरि गिक्छा प्रियासा तामाङ, ङ्छिा विपीन तामाङ, सोमछा रजनी तामाङ पुरस्कृत ताबा मुला ।

कक्षा २ ला सांगीतिक कुर्सिरि गिक्छा संकेत तामाङ, ङ्हिछा संकल्प तामाङ, सोमछा समिक्षा तामाङ पुरस्कृत ताबा मुला ।

कक्षा ३ रि क्लाङ्बा न्हाङ माङ्ग्यार क्लाङरि गिक्छा राधिका देवकोटा, ङ्हिछा श्रेजल लामिछाने, सोमछा श्रेया तामाङ पुरस्कृत ताबा मुला ।

कक्षा ४ ला गिलास छ्योङ्बारि गिक्छा रोमन तामाङ, ङ्हिछा सुप्रिना तामाङ, सोमछा सुमन तामाङ पुरस्कृत ताबा मुला ।

कक्षा ५ ला बोतल छ्योङ्बारि गिक्छा रितु तामाङ, ङ्हिछारि जुना तामाङ, सोमछारि लक्ष्मी लामिछाने पुरस्कृत ताबा मुला ।

कक्षा ६ ला दाप का क्लाङरि गिक्छा रेमन तामाङ, ङ्हिछा क्रिसन तामाङ, सोमछा राम तामाङ पुरस्कृत ताबा मुला ।

कक्षा ७ ला हिसाब क्लाङरि गिक्छा लक्षु तामाङ, ङ्हिछा रिजन तामाङ, सोमछा समिक्षा लामिछाने पुरस्कृत ताबा मुला ।

कक्षा ८ ला चम्चा गुच्चा छ्योङ्बारि गिक्छा क्रिस तामाङ, ङ्हिछा राजिब तामाङ, सोमछा संगम तामाङ पुरस्कृत ताबा मुला ।

लोप्खेनजुगुसे नोन क्लाङ प्रतियोगितारि बोकिन्बा मुबा । चम्बा गुम्बा छ्योङ्बा प्रतियोगितारि लोप्खेनजुगु विष्णुबहादुर खड्का क्षेत्री गिक्छा, सुशिला तामाङ ङ्हिछा, दिनेश गोले सोमछा तासि पुरस्कृत ताबा मुबा ।

लोप्खाङ डिछ्या समितिला चोहो अन्जान रुम्बा तामाङला चोहोदानरि ताबा चु गेताङरि स्हेङ्खेन प्रधानाध्यापक बोगटी, सादाता तामाङ, महेन्द्र उच्च माविला प्रधानाध्यापक शशीकुमार थपलियाला छ्याम ल्होलो डोन्बोजुगुसे ज्याबाम्हान्बा पिन्बा मुबा ।

चु लोप्खाङरि दाते ९७ लोप्बोनजुगुसे डोबाकेन मुला ।

(चु तामसोरला स्रोत म्हि प्रभा ढुङ्गाना थेन बृष तामाङ हिन्ना ।)